Fenyr SuperSport er jafnoki Bugatti Veyron

W Motors í Dubai er nú með til sýnis nýjustu afurð sína, Fenyr SuperSport bíl með 900 hestafla vél sem er 2,7 sekúndur í hundraðið og með 400 km hámarkshraða. Það eru svipaðar árangurstölur og Bugatti Veyron er skráður fyrir.

W Motors var einmitt með Lykan HyperSport bíl sinn í myndinni Fast and the Furious 7, en þessi nýi bíll er öflugri en hann. Kraftinn fær hann úr 4,0 lítra 6 strokka vél og tveimur RUF risaforþjöppum. Hann er með 7 gíra sjálfskiptingu með tveimur kúplingum.

Bíllinn er bara 1.200 kíló og skýrir það ef til vill best hversu snöggur hann er, en yfirbygging hans er smíðuð úr koltrefjum. Það er þó óskandi að W Motors færi sönnur fyrir getu bílsins með myndskeiði eða prufunum óháðra einstaklinga svo allir geti nú tekið þessar tölur trúanlegar.

Framleiðsla á Fenyr SuperSport verður takmörkuð við 25 bíla og fyrirtækið segir að framleiðsla hans sé gerð í samstarfi við austurríska bílasmiðinn Magna Steyr og að bíllinn hafi verið teiknaður af StudioTorino í Ítalíu. Ekki kemur fram hvað hann á að kosta, en það er örugglega til nóg af kaupendum í löndunum kringum Dubai.