Flottur Toyota C-HR í Genf

Bílasýningin í Genf hefst á morgun og verða þar margar frumsýningar á nýjum bílum. Meðal þeirra verður sýndur þessi knái jepplingur frá Toyota, C-HR. Þessi bíll er svo til óbreyttur frá frumsýningu fyrri bíls Toyota, sem fyrirtækið sýndi sem Scion bíl á LA Auto Show bílasýningunni í fyrra.

Scion er í eigu Toyota og bílar með því merki hafa aðallega verið markaðssettir í Bandaríkjunum en Toyota tók nýverið ákvörðun um að leggja niður merkið Scion og setja Toyota merkið á þá alla í framhaldinu.

Framljós C-HR hafa þó breyst frá fyrri gerð og eru nú grimmari og ekki lengur kringluleit. Einnig hefur bæst við loftinntak fyrir neðan Toyota merkið og fyrir vikið er framendi bílsins laglegri og sportlegri. Ekki er loku fyrir það skotið að þessi nýi bíll Toyota minni örlítið á Nissan Juke og er bíllinn í sama stærðarflokki og á örugglega að rífa sölu frá þeim bíl.

Toyota mun kynna þennan nýja bíl með tvinntækni en hann verður einnig í boði sem hefðbundinn bíll með brunavél. Bíllinn er með sama undirvagn og nýr Toyota Prius. Toyota hefur ekki látið uppi hvenær von er á markaðssetningu þessa nýja bíls en kannski skýrist það á bílasýningunni í Genf.