Hyundai Tucson helsta ósk ökumanna MotorWeek

Stjórnendur hins vinsæla bandaríska sjónvarpsbílaþáttar MotorWeek veittu Hyundai Tucson verðlaun á alþjóðlegu bílasýningunni í Chicago þegar þeir sögðu sportjeppann „helstu ósk ökumanna MotorWeek“ (MotorWeek's Drivers' Choice Award) og jafnframt þann besta í sínum flokki (Best Small Utility) segir í umsögn MotorWeek.

Við verðlaunaafhendinguna sagði John Davis, stjórnandi og stofnandi MotorWeek, að Tucson væri „ferskari og betur búinn en nokkur annar bíll í sama flokki og einnig á frábæru verði miðað við útbúnað. Gæðin, sem blasa hvarvetna við, ættu að heilla neytendur og halda merki framleiðandans á lofti.“

Enginn bílaþáttur í Bandaríkjunum hefur verið lengur á dagskrá í sjónvarpi en MotorWeek og hafa þessi verðlaun verið veitt allt frá árinu 1983. MotorWeek ber saman bíla út frá aðaláherslum neytenda sem eru verð, notagildi, afl og eldsneytisnotkun. Að því loknu eru bestu bílarnir valdir og aðgreindir út frá mismunandi lífsstílsflokkum.