Brak sem mögulega er úr MH370 flutt til Ástralíu

Tveir hlutir, sem mögulega koma úr týndu malasísku flugvélinni MH370, hafa verið sendir til Ástralíu til greiningar. Um er að ræða málmplötu sem fannst undan ströndum Mósambík í Afríku í febrúar og annan hlut sem fannst þar í landi í desember. Einungis eitt brot úr vélinni hefur fundist þrátt fyrir gífurlega umfangsmikla leit.

Vélin hvarf fyrir rétt rúmum tveimur árum á leið frá Kúala Lúmpúr til Peking með 239 manneskjur um borð.

Sjá einnig: Hvarf MH370 enn ráðgáta

Sérfræðingar í Ástralíu vinna nú að því að staðfesta hvort að brotin séu úr MH370 eða ekki. Stjórnvöld í Malasíu hafa sagt að það væri líklegt að brakið sem fannst í febrúar væri úr Boeing 777 flugvél, sömu gerð flugvélar og MH370 var.

Yfirvöld í Ástralíu leiða leitina að flugvélinni þar sem talið er að hún hafi brotlent undan vesturströnd landsins, í Indlandshafi.

Fyrir skömmu fannst annar hlutur á Reunion eyju, en rannsakendur segja ólíklegt að það sé af flugvélinni týndu.