Ssangyong til Bandaríkjanna árið 2019?

Forstjóri S-kóreska bílaframleiðandans Ssangyong hefur látið hafa eftir sér að fyrirtækið hafi í hyggju að hefja sölu bíla sinna í Bandaríkjunum árið 2019. Ssangyong er fjórði stærsti bílaframleiðandi S-Kóreu og bílar Ssangyong hafa verið til sölu hérlendis hjá Bílabúð Benna og er Musso jeppi Ssangyoung líklega þekktasti bíll þeirra hér á landi.

Ssangyong leggur í bílaflóru sinni mikla áherslu á jeppa og jepplinga og rýmar það vel við mikla eftirspurn eftir slíkum bílum í heiminum, ekki síst vestanhafs. Forstjóri Ssangyong sagði að sala bíla í Bandaríkjunum gæti haft úrslitaáhrif á framtíð fyrirtækisins, góður árangur þar gæti fært því nýtt líf en fjarvera á þeim markaði gæti ráðið fyrirtækinu að fullu.

Ssangyong er nú í eigu bílaframleiðandans Mahindra á Indlandi og bjargaði Mahindra Ssangyong frá gjaldþroti árið 2011 með kaupum á félaginu. Forstjóri Mahindra hefur ekki úttalað sig um áhugann á Bandaríkjamarkaði og fremur talað um Kína sem lykilmarkað, en þar hefur þó hægst mjög á bílasölu á meðan vöxturinn hefur verið mikill í Bandaríkjunum.

Stærsti útflutningsmarkaður Ssangyong hefur verið í Rússlandi undanfarin ár en salan þar hefur minnkað mjög á síðustu árum og gert Ssangyong erfitt um vik að undanförnu.