Grátlegasta tap bílaframleiðanda í sögu Le Mans

Þegar örfáar mínútur voru eftir af 24 klukkustunda þolakstrinum í Le Mans í Frakklandi um síðustu helgi var bíll Toyota með forystuna og allt stefndi í fyrsta sigur bílaframleiðanda frá Japan síðan Mazda vann keppnina árið 1991. Þá bilaði loftslanga milli forþjöppu og keflablásara bíls Toyota og bíll frá Porsche sigldi framúr og hafði sigur rétt eins og í fyrra.

Aldrei í sögu keppninnar hefur munað svo litlu og tilvonandi sigurbíll eins nálægt sigri og nú. Toyota menn er ennþá að velta fyrir sér hvað fór úrskeiðis og munu sannarlega tryggja það að þessi bilun verði ekki til þess að fella liðið aftur.

Á endanum tókst að hluta til að gera við bíl Toyota og hann silaðist í mark en þar sem það tók bílinn meira en 6 mínútur að klára síðasta hringinn var bíllinn dæmdur úr leik. Grátlegra getur það hreinlega ekki orðið.