Benz og BMW draga á Audi í Kína

Audi hefur lengi verið það þýska lúxusbílamerki sem selt hefur flesta bíla í Kína. Audi bar gæfu til þess að hefja fyrst þeirra öfluga markaðssókn í þessu stærsta bílalandi heims nú og reisti fyrst þeirra þriggja bílaverksmiðju þar. Mercedes Benz og BMW hafa hinsvegar verið að sækja sig mjög í sölu í Kína og vöxtur þeirra beggja er umtalsvert meiri þar en hjá Audi undanfarið.

Í síðasta mánuði var vöxtur Mercedes Benz 26% á kínverska bílamarkaðinum, 19% hjá BMW en 9,9% hjá Audi. Audi selur ennþá fleiri bíla en hinir tveir, eða 46.454 í síðasta mánuði á meðan Benz seldi 37.277 og BMW 40.200 bíla. Á fyrstu 7 mánuðum ársins hefur Audi selt 335.580 bíla í Kína en BMW 287.753 og Mercedes Benz 257.276 bíla. Vöxtur Audi á árinu nemur 6,5%, BMW 8,5% en heil 32% hjá Mercedes Benz, sem sækir hraðast á í sölu í Kína.

Öll fyrirtækin hafa uppi mikil áform um aukna sölu með kynningu á nýjum bílgerðum. BMW kynnti fyrst X1 jeppling sinn í maí á þessu ári, Audi bætir við A4 í lengri gerð en grunngerðin og Benz ætlar að kynna lengri gerð E-Class bíls síns í haust. Ekkert þessara fyrirtækja er með allar sínar bílgerðir á markaði í Kína, en þeim mun fjölga mjög á næstunni.