Audi A9 rafmagnsbíll með 500 km drægni

Það er ljóst að þeim hjá Audi er full alvara með rafmagnsbílasmíði sinni. Audi hefur nú tilkynnt um smíði mjög langdrægs stórs fólksbíls sem óhætt verður að skilgreina sem flaggskipsins í bílaflota Audi. Á hann að koma á göturnar áður en áratugurinn er á enda. Þessi bíll mun væntanlega fá stafina A9, enda stærri en A8 og hann verður eingöngu drifinn áfram af rafmagni.

A9 á að komast ríflega 500 km á hverri hleðslu, sem er ámóta langt og nýjasti Tesla Model S P100D bíllinn. Audi A9 rafmagnsbíllinn mun fá meira en 400 hestöfl sem koma frá 3 rafmagnsmótorum. Það er sama drifrásin og verður í nýjum tilvonandi Audi Q6 e-tron jeppa.

Rupert Stadler forstjóri Audi lét hafa eftir sér um leið og hann kynnti áformin um A9 að árið 2025 verði fjórði hver bíll sem framleiddur verður af Audi rafmagnsbíll. Audi A9 á að geta ekið sjálfur, en áhersluatriði Audi verður ekki á þá tækni bílsins, heldur á hann að vera svo góður akstursbíll að eigendur hans vilji miklu fremur aka bílnum sjálfir.