Nýi Volkswagen jeppinn í Kína

Volkswagen hefur unnið að smíði nýs jeppa sem meiningin er að markaðssetja á Bandaríkjamarkaði, en einnig í Kína og líklega fyrst þar. Það má merkja af því að þessi mynd náðist af jeppanum án feluklæða í Kína um daginn. Í Kína fær bílinn nafnið Teramont en þessi bíll er býsna líkur Croosblue tilraunabílnum sem Volkswagen sýndi fyrst á bílasýningunni í Detroit árið 2013.

Hann er með sömu LED-framljósin og Crossblue, en afturljósin hafa breyst úr því að vera hringlaga í teygðari ljós sem einnig eru með LED-tækni. Bíllinn er greinilega með V6 vél en merki um það er aftan á bílnum, en líklega er það sama 3,6 lítra vélin sem finna má í Passat í Bandaríkjunum. Engu að síður er líklegt að bíllinn verði einnig í boði með fjögurra strokka vél með forþjöppu og síðar meir með tengiltvinnaflrás.

Bíllinn sem myndir náðust af í Kína er leðurklæddur að innan og frekar ríkulegur. Í fyrri áætlunum Volkswagen var meiningin að merkaðssetja þennan jeppa í Bandaríkjunum fljótlega á næsta ári, en þar verður hann í boði með þriðju sætaröðinni og á hann að hýfa upp dræma sölu Volkswagen bíla þar í landi. Sala Volkswagen bíla í Bandaríkjunum hefur verið dræm frá uppgötvun dísilvélasvindls Volkswagen.