Viðskiptastjóri Jóns Ásgeirs hjá Glitni sendi honum yfirlit yfir skuldir Fons við bankann

Bjarni Jóhannesson, viðskiptastjóri flestra félaga Jóns Ásgeirs Jóhannessonar hjá Glitni árið 2008 áður en bankinn féll, sendi Jóni í júní það ár yfirlit yfir skuldir félagsins Fons við Glitni en Fons var í eigu Pálma Haraldssonar. Pálmi og Jón Ásgeir voru á þessum tíma viðskiptafélagar en fyrir dómi í dag sagðist Bjarni ekki minnast þess að hann hefði fengið samþykki hjá Pálma fyrir því að senda yfirlitið á Jón Ásgeir.

Bjarni er ákærður fyrir hlutdeild í meintum umboðssvikum þeirra Lárusar Welding, fyrrverandi forstjóra Glitnis, og Magnúsar Arnar Arngrímssonar, fyrrverandi framkvæmdastjóra fyrirtækjasviðs bankans, í Aurum-málinu svokallaða. 

Jón Ásgeir er einnig ákærður fyrir hlutdeild en hann var einn stærsti eigandi Glitnis þegar meint brot áttu sér stað. Allir ákærðu neita sök og sögðu til að mynda þeir Lárus og Magnús fyrir dómi í dag að staða Glitnis hefði verið betri eftir lánveitinguna.  

 

Málið snýst um sex milljarða króna lánveitingu Glitnis í júlí 2008 til félagsins FS38 ehf. sem var í eigu Pálma. Bjarni útbjó lánabeiðnina en lánið var svo notað til að kaupa 25,7 prósenta hlut Fons í bresku skartgripakeðjunni Aurum Holdings Limited.



Segir saksóknara hafa vísvitandi beitt blekkingum

Áður en Ólafur Þór Hauksson héraðssaksóknari tók til við að spyrja Bjarna út í ákæruatriðin ávarpaði hann dóminn. Hann lýsti sig saklausan af ákærunni en sagði svo:

„Ég hef nánast enga reynslu af dómsmálum og sakamálum en ég treysti því í upphafi að ákæruvaldið kæmi heiðarlega fram og myndi gera allt til að leiða sannleikann í ljós. Það var því mikið áfall þegar kom í ljós að ákæruvaldið gerði það ekki.“

 

Bjarni vísaði síðan til verðmata á Aurum sem hann sagði samtímagögn. Áður hafði verið komið inn á þau við aðalmeðferðina þar sem bæði verjendur og Lárus Welding gerðu athugasemdir við það að gögnin hefðu upphaflega ekki verið hluti af málinu. Að mati þeirra sýna verðmötin nefnilega fram á að ekkert saknæmt hafi átt sér stað en Bjarni sagði það „vísvitandi blekkingar“ hjá ákæruvaldinu að leggja gögnin ekki fram í upphafi.

 

Á meðal þess sem saksóknari spurði Bjarna var hvort að hann hefði vitað um aðdraganda láns Glitnis til FS38 eða hvort að Jón Ásgeir hafi eitthvað þrýst á hann. Bjarni svaraði báðum spurningunum neitandi. Aðspurður hver hefði tekið ákvörðunina um að veita lánið sagði Bjarni að það hefði áhættunefnd bankans gert.

Jón Ásgeir ekki eini viðskiptavinurinn sem ýtti á viðskiptastjórann

Undir hann voru síðan bornir tölvupóstar sem Jón Ásgeir sendi Bjarna vorið 2008 og snerust um lánveitingar Glitnis til Fons. Í einum póstinum stendur aðeins „klára“ og var Bjarni spurður hvernig hann hefði lesið í þennan póst.

„Ætli hann sé ekki bara að ýta á mig...“ svaraði Bjarni en saksóknari greip þá boltann á lofti og spurði hvort að Jón Ásgeir hafi verið að þrýsta á hann. 

„Þeir voru svo sem ekki einir um það,“ sagði Bjarni.

Bjarni var síðan spurður út í annan tölvupóst frá Jóni Ásgeiri sem hann sendi einnig á Lárus Welding. Í póstinum var nokkurs konar verkefnalisti yfir mál sem þurfti að klára en aðspurður sagði Bjarni að það hefði komið fyrir að hann fengi lista af þessu tagi frá viðskiptamönnum bankans. Verjandi hans spurði hann svo síðar hvort það hefði verið algengt að viðskiptavinir væru að þrýsta á um afgreiðslu mála. Svaraði Bjarni því til að það hefði verið algengt. 

 

Saksóknari spurði Bjarna hvort hann hefði talið að Glitnir væri í klemmu vegna Aurum-málsins en Bjarni svaraði því til að hann hefði ekki upplifað það. Hann var þá spurður út í tölvupóst sem hann sendi til Jóns Ásgeirs í 15. júní 2008 en í viðhengi póstsins var að finna yfirlit yfir skuldastöðu Fons. Saksóknari spurði Bjarna hvers vegna hann hafi sent Jóni Ásgeiri yfirlitið.

„Telur að LW hafi svikið sig ofl.“

„Hann var að vinna fyrir hann og ég held að við höfum verið að reyna að vinna okkur inn bandamenn,“ sagði Bjarni. Hann kvaðst ekki minnast þess að hafa fengið samþykki frá Pálma Haraldssyni eiganda Fons fyrir því að senda yfirlitið.

Í öðrum pósti frá Jóni Ásgeiri til Bjarna segir hann um Pálma:

„Er að reyna að vinna í karlinum gengur lítið telur að LW hafi svikið sig ofl.“

 

Á tölvupóstsamskiptunum sést að Bjarni og Jón Ásgeir eru að fara yfir málefni Fons hjá Glitni, meðal annars tap félagsins og tryggingastöðu. Aðspurður hvers vegna þeir hafi verið að ræða málefi Fons sagði Bjarni:

 

„Kemur ekki fram að hann hafi verið að tala við Pálma? Ég geri ráð fyrir því að hann hafi verið að koma fram fyrir hans hönd.“

 

​Jón Ásgeir gefur skýrslu í fyrramálið

Í ákærunni er rakið hvernig láninu var ráðstafað en um 2,8 milljarðar voru millifærðir til að greiða upp eftirstöðvar á láni Glitnis til Fons sem hafði verið veitt í nóvember 2007. Þá voru tveir milljarðar greiddir inn á reikning í eigu Fons, félaginu til ráðstöfunar.

Eftir stóðu þá 1,2 milljarðar sem voru lagðir inn á handveðsettan reikning Fons hjá markaðsviðskiptum Glitnis en peningarnir áttu að bæta tryggingastöðu félagsins hjá Glitni.

 

Þann sama dag millifærði Glitnir svo einn milljarð af reikningi Fons inn á reikning í eigu Jóns Ásgeirs Jóhannessonar sem hann nýtti, samkvæmt ákæru, til þess að greiða upp rúmlega 700 milljóna króna ótryggða yfirdráttarskuld sína hjá Glitni.

 

Saksóknari spurði Bjarna hvort það hefði alltaf legið fyrir að Jón Ásgeir myndi njóta góðs af lánveitingunni.

„Það kom á daginn en það skiptir ekki höfuðmáli gagnvart mér því það voru einhver óuppgerð viðskipti milli Pálma og Jóns,“ svaraði Bjarni.

 

Aðalmeðferð málsins heldur áfram í fyrramálið þegar Jón Ásgeir Jóhannesson sest í vitnastúkuna.