Minni vélar ekki svarið við lægri eyðslu

Á síðustu árum hafa bílaframleiðendur sett sífellt minni vélar í bíla sína í því augnamiði að minnka eyðslu þeirra og mengun. Svo virðist þó vera að ákveðnum punkti sé náð í þeim fræðum því nú heyrast fréttir af því að sumir þeirra hyggist snúa við þessari þróun og útbúa bíla sína með stærri vélum.

Ástæða þess er sú að þessar smáu vélar virðast margar hverjar menga meira en en stærri vélar í sömu bílum. Renault-Nissan ætlar sem dæmi að stækka 1,6 lítra R9M dísilvél sína um 10% og hætta framleiðslu hinnar smáu 0,9 lítra H4Bt bensínvélar, en hún hefur bæði þótt eyða of miklu eldsneyti og menga óhóflega. Í stað þessarar vélar kemur vél með stærra sprengirými sem mengar minna og eyðir minna eldsneyti.

Það er því ekki allt fengið með því að minnka bílvélar og svarið við eldsneytissparnaði og minni mengun er ekki endilega fólgin í því að minnka sprengirými vélanna. Renault, General Motors og Volkswagen munu öll hætta framleiðslu á minnstu vélargerðum sínum á næstu 3 árum. GM ætlar að hætta framleiðslu á 1,2 lítra dísilvél sinni og Volkswagen mun skipta út 1,4 lítra og þriggja strokka vélinni í Volkswagen Polo og í hennar stað kemur fjögurra strokka 1,6 lítra vél.