Sýnir sjónvarpsbakara Skagann og skyrkökur í þætti Food Network

Eva Laufey Kjaran Hermannsdóttir verður tekin fyrir í þætti Paul Hollywood á Food Network. Hún ætlar að baka handa honum skyrkökur og sýna honum Akranes. Food Network fékk áhuga á Evu eftir að hafa lesið nýjustu bókina hennar Kökugleði Evu.

„Food Network-teymið er á landinu að taka upp þátt og hann er að koma til mín hann Paul Hollywood, einn þekktasti bakari og sjónvarpsmaður í Bretlandi. Við erum að fara að baka saman,“ segir Eva Laufey Kjaran Hermannsdóttir, sjónvarpskokkur og matarbloggari.

Paul Hollywood er hvað þekktastur fyrir að vera einn dómarinn í hinum gríðarvinsæla sjónvarpsþætti The Great British Bake Off á BBC, en þættirnir sem eru nú á sínu sjöunda ári eru taldir hafa endurvakið áhuga Breta á bakstri og voru langvinsælustu þættirnir á BBC Two fyrstu árin sem þeir voru sýndir og hafa nú verið færður yfir á BBC One.

„Hann er sem sagt með þátt sem heitir Paul Hollywood City Bakes þar sem hann ferðast til mismunandi landa og fræðist um matargerð í hverju landi fyrir sig og nú er komið að Íslandi. Mitt hlutverk er að sýna honum íslenskan bakstur. Við ætlum mest að fjalla um skyr og skyrkökur. Ég mun leyfa honum að smakka nokkrar kökur og fara með honum upp á Akranes og sýna honum aðeins Skagann. Ég ætla að fara með hann í Verslun Einars Ólafssonar, sem er ein af elstu búðum landsins, svona kaupmaðurinn á horninu. Síðan ætlum við bara heim til mín og baka.“

Hvernig kemur það til að þau á Food Network leita til þín?

„Þau komu hingað í leiðangur fyrir svona mánuði og sáu þar kökubókina mína og fundu út að ég væri tilvalin í að sýna Paul skyrkökur og þess vegna ætlum við að gera skyrkökur.“

Eva Laufey gaf nýlega út bókina Kökugleði Evu þar sem hún birtir einar áttatíu uppskriftir að kökum og það er einmitt þessi bók sem Paul Hollywood og fólkið í Food Network fann í vettvangsleiðangri sínum til landsins.

Hvenær getum við síðan horft á þessi herlegheit?

„Ég veit ekki hvenær þetta verður sýnt en það er væntanlega eftir áramót í næstu seríu þáttanna,“ segir Eva Laufey að lokum. Það verður ansi fróðlegt að sjá hvernig Paul Hollywood líst á skyrkökurnar hennar Evu.