Bíl Queen Latifah stolið á bensínstöð

Fræga fólkið verður ekki síður fyrir barðinu á þjófum en almenningur og á því fékk leikkonan og söngvarinn Queen Latifah að kenna á fyrir skömmu. Mercedes Benz bíl hennar var stolið af óprúttnum náungum á bensínstöð þann 20. desember.

Latifah var þó ekki sjálf á bílnum þegar honum var stolið, heldur Keith nokkur Shephard. Keith var að fjarlægja bensíndæluna úr bílnum þegar hann fór allt í einu af stað og hvarf sýnum. Til allrar hamingju er búnaður í Mercedes Benz bíl Queen Latifah sem tryggir að ávallt má sjá staðsetningu bílsins og með aðstoð Mercedes Benz og lögreglunnar var haft uppá bílnum og hann því aftur kominn í hendurnar á drottningunni.

Bíllinn fannst í bænum Mechanicsville í Georgíuríki. Rétt fyrir þjófnaðinn sáust þrír menn dökkir á hörund koma að bensínstöðinni á hvítum BMW og Dodge Charger bílum og reyndust þar fara þjófarnir. Engar skemmdir voru unnar á Mercedes bíl Latifah, en líklega sitja nú þjófarnir bak við lás og slá.

Búnaður eins og sá sem er í bíl Latifah er nú í boði hjá sífellt fleiri bílaframleiðendum og reynist einkar hjálplegur til að finna stolna bíla. Ekki veitir víst af því í Bandaríkjunum og mun vonandi fækka þjófnuðum á bílum þar sem annarsstaðar.