Meiri hjálp á leiðinni fyrir Gylfa og félaga

Tom Carroll verður væntanlega orðinn leikmaður Swansea City áður en dagurinn er liðinn en velska liðið er að ganga frá kaupum á miðjumanninum frá Tottenham.

Carroll fer í læknisskoðun hjá Swansea í dag og það er fátt sem kemur í veg fyrir að hann verði orðinn nýjast liðsfélagi Gylfa Þórs Sigurðssonar hjá Swansea.

Tom Carroll hefur spilað áður með Swansea en þá kom hann á láni og lék allt 2014-15 tímabilið með velska liðinu.

BBC hefur heimildir fyrir því að kaupverðið sé í kringum 4,5 milljónir punda eða um 620 milljónir íslenskra króna.

Tom Carroll kom upp í gegnum unglingastarfið hjá Tottenham en hefur aðeins komið við sögu í þremur leikjum Tottenham á leiktíðinni.

Swansea City er í vondum málum í neðsta sæti deildarinnar og tapaði 4-0 á móti Arsenal um helgina. Liðið hefur skipt tvisvar um knattspyrnustjóra á leiktíðinni og þarf nauðsynlega meiri hjálp.

Tom Carroll verður annar leikmaðurinn sem Swansea City fær til sína í janúarglugganum en liðið hafði áður náð í Luciano Narsingh frá PSV Eindhoven. Hvort að þessir tveir leikmenn séu nægur liðstyrkur fyrir liðið er aftur á móti önnur saga.