Óska eftir tilboðum í allt hlutafé Cintamani

Eigendur Cintamani kanna samkvæmt heimildum Markaðarins mögulega sölu á öllu hlutafé íslenska fataframleiðandans og hafa þeir fengið sænska fjármálafyrirtækið Beringer Finance til að sjá um samskipti við valinn hóp fjárfesta. Stutt fjárfestakynning (e. teaser) var send út fyrir skemmstu og fjárfestum gefinn frestur til júníloka til að skila inn óskuldbindandi tilboðum.

Einar Karl Birgisson, framkvæmdastjóri Cintamani, segir formlegt söluferli ekki hafið og að engin ákvörðun hafi verið tekin um hvort fyrirtækið verði boðið til sölu. Beringer hafi verið fengið til að meta næstu skref eftir að eigendum fataframleiðandans hafi borist tilboð í fyrirtækið fyrir nokkrum mánuðum.

„Eigendum félagsins barst tilboð fyrir nokkrum mánuðum og uppfrá því leituðu þeir til Beringer til að gera ákveðna kostagreiningu. Það er hvaða kostir eru í stöðunni eftir að tilboðið barst og hvað sé rétta skrefið í stöðunni. Fyrirtækið er því ekki í eiginlegu söluferli því eigendurnir eru alveg eins líklegir til að stíga önnur skref ef niðurstaða Beringer verður á þá leið,“ segir Einar Karl.

„Við höfum verið í gríðarlega mikilli uppbyggingu á félaginu innanfrá undanfarna fjórtán mánuði. Við skynjum árangur þess og því þótti mér áhugavert að við fengum tilboð í fyrirtækið sem var ekki svarað á annan hátt en að menn fóru í þessa vinnu með Beringer.“

Cintamani er í eigu Kristins Más Gunnarssonar, stjórnarformanns fyrirtækisins, og Frumtaks slhf. Kristinn á 70 prósenta hlut en Frumtak er í eigu Nýsköpunarsjóðs atvinnulífsins, sex lífeyrissjóða og stóru viðskiptabankanna þriggja.

Heimildir Markaðarins herma að í fjárfestakynningunni hafi áætlaðar tekjur Cintamani á þessu ári verið gefnar upp. Þær eigi að nema um 1.100 milljónum króna og gert sé ráð fyrir að rekstrarhagnaður (EBITDA) muni nema um 145 milljónum króna. Fataframleiðandinn var rekinn með tæplega 30 milljóna króna hagnaði árið 2015 samkvæmt síðasta birta ársreikningi hans. Afkoman þá var mun betri en árið á undan þegar reksturinn skilaði 3,7 milljóna hagnaði. Aðalstarfsemi Cintamani er fólgin í hönnun, framleiðslu og sölu á útivistarfatnaði og rekur fyrirtækið sex verslanir hér á landi.