Vantar um 1000 laxa miðað við sama tíma í fyrra

Eystri Rangá hefur í mörg ár verið ein af gjöfulustu laxveiðiám landsins og þess er skemmst að minnast þegar júníveiðin í klakveiðinni skilaði met fjölda laxa í klakkisturnar.

Þessu er öðru vísi farið í ár en þegar veiðitölur síðustu viku eru skoðaðar er heildarveiðin í Eystri Rangá aðeins 98 laxar þann 5. júlí og þar munar um 1000 löxum á veiðinni milla ára 2016 og 2017.  Klakveiðin í fyrra gekk vonum framar eins og áður segir og það var ótrúlegt að sjá hversu mikið af laxi var þegar genginn þegar klakveiðin hófst í byrjun júní.   Það er svo sem vitað að það voru mjög snemmgengnar göngur í árnar um allt land í fyrra sem útskýrir að stórum hluta hvers vegna veiðin var svona góð í ánni í fyrra en það er erfitt að leggja það fram sem skýringu á veiðinni núna.

Það er þó algjör óþarfi að örvænta því þetta gefur engann veginn rétta mynd af ánni eða tímasetningu á göngunum í hana.  Ef við skoðum sem dæmi árið 2015 þegar heildarveiðin í Eystri Rangá var 2749 laxar voru aðeins komnir 91 laxar á land 8. júlí það sumar og ef við skoðum síðan sumarið 2010 þa´voru komnir 137 laxar á land 7. júlí en sumarið skilaði engu að síður 6280 löxum.  SUmarið 2007 komu 7473 laxar á land og þá voru aðeins 28 laxar komnir á land 11.júlí.  Laxinn kemur yfirleitt sterkastur inn eftir miðjan júlí svo þó veiðin núna sé afar róleg þá eru ennþá 7-10 dagar í að fyrsti kippurinn ætti að koma í veiðina í ánni og ef Eystri fer í þann takt sem við þekkjum hana ættu 300-400 laxa vikur að vera skammt undan ef veiðigyðjan stendur sína plikkt.