Vinsælustu bílar hvers Evrópulands

Það kemur vafalaust engum á óvart að vinsælasta bílgerðin í Tékklandi sé Skoda Octavia enda bíllinn framleiddur þar í landi, en færri vita ef til vill að vinsælasta bílgerðin í Danmörku er Peugeot 208. Á þetta við það sem af er liðið þessu ári. Skoda Octavia er reyndar mest selda bílgerðin í fleiri Evrópulöndum, það er í Finnlandi, Króatíu, Eistlandi, Póllandi og í Sviss. Önnur gerð Skoda, þ.e. Fabia er svo vinsælasta bílgerðin í Slóvakíu.

Annar bíll sem er sá vinsælasti í mörgum löndum er Volkswagen Golf, en hann er sá mest seldi í Þýskalandi, Austurríki, Noregi, Belgíu og Luxemborg. Sá vinsælasti í Frakklandi er Renault Clio og reyndar í Hollandi og Portúgal einnig. Á Ítalíu er það Fiat Panda og Fiat 500 í Litháen. Í Grikklandi er það Toyota Yaris sem flestir kaupa og það á líka við á Íslandi.

í Ungverjalandi er það Suzuki Vitara sem er sá mest keypti, á Írlandi Hyundai Tucson, Lettlandi Nissan Qashqai, Rúmeníu Dacia Logan og í Slóveníu Peugeot 3008, en sá bíll er bíll ársins í Evrópu og á Íslandi. Ekki kemur á óvart að sá mest seldi á Spáni er Seat Ibiza og í Svíþjóð Volvo XC60, né heldur að sá vinsælasti í Bretlandi sé Ford Fiesta.