Sár skilnaður í ljúfum djasstónum

„Það er erfiðara að semja á persónulegum nótum. Fólk í kringum mig er mikið að skoða textana og spyrja hvort þetta lag eða hitt sé um sig,“ segir tónlistarkonan Brynhildur Oddsdóttir, forsprakki hljómsveitarinnar Beebee and the bluebirds. Auk hennar eru þeir Tómas Jónsson, Brynjar Páll Björnsson og Ásmundur Jóhannsson í bandinu.

Hljómsveitin gaf nýverið út plötuna Out of the dark en útgáfutónleikarnir verða þó ekki fyrr en í janúar. Brynhildur ætlar að stinga af til Flórída og vera þar um jólin.

„Ég ætla að safna orku og slaka á. Ég hef ekki gert þetta áður og ég held að maður komi þvílíkt ferskur til baka. Vonandi stenst það að vera búin að koma disknum út í búðir og klára allt sem ég þarf að gera áður en ég heldur vestur um haf þannig að maður fari áhyggjulaus í sólina.“

Brynhildur er útskrifuð úr almennum tónsmíðum frá Listaháskóla Íslands, einnig á rafmagnsgítar í FÍH og er núna að læra hjá Þórði Árnasyni. Þá kennir hún á gítar og tónfræði í tónlistarskólanum Tónsölum. Það kemur því lítið á óvart að hún mundi gítarinn á þessari plötu en sú var ekki raunin á fyrri plötu hljómsveitarinnar.

„Ég spilaði nánast ekkert á gítarinn á fyrri plötunni en á þessari sé ég um gítarleikinn sem er nýlunda.“ Hún segir plötuna vera uppgjör eftir skilnað sem hún gekk í gegnum. „Þetta er persónuleg plata ef ég á að vera hreinskilin. Eftir skilnaðinn settist ég niður og samdi. Þetta er líka um upplifunina sem kemur eftir á.

Mér fannst svolítið erfitt að koma þessu efni frá mér, það var einhvern veginn meira stressandi. En ég er nú alveg ágætlega vel brynjuð og þetta varð ekkert svakalegt mál,“ segir Brynhildur.