Hamrarnir upp úr fallsæti

West Ham sótti annan sigur sinn í síðustu þremur leikjum í 3-0 sigri gegn Stoke á Britianna-vellinum í dag en með því komust Hamrarnir upp úr fallsæti í bili.

Eftir að hafa óvænt fengið fjögur stig út úr leikjum gegn nágrönnum sínum í Arsenal og Chelsea var mótherji dagsins Stoke sem var einnig við fallsætin.

Fresta þurfti leiknum um klukkustund fyrr í dag vegna rafmagnsleysis á Britianna-vellinum en nánar má lesa um það hér.

Mark Noble kom gestunum frá London yfir á 19. mínútu en austurríski framherjinn Marko Arnautovic bætti við öðru marki korteri fyrir leikslok.

Diafra Sakho innsiglaði svo sigurinn á 86. mínútu með þriðja marki West Ham stuttu síðar.

West Ham skaust með sigrinum upp í 15. sæti deildarinnar eftir að hafa fengið sjö stig úr síðustu þremur leikjum.