Hjónabandi Jennifer og Justin lokið

Hollywoodstjörnurnar Jennifer Aniston og Justin Theroux hafa ákveðið að slíta samvistum. Þau höfðu verið gift í tvö ár. Parið, sem sagt er hafa kynnst við tökur myndarinnar Wanderlust, sendi frá sér yfirlýsingu þar sem það segir ákvörðunina hafa verið tekna í mesta bróðerni í lok síðasta árs.

Þau gefa ekki upp neina ástæðu fyrir skilnaðinum en segjast þó ætla að reyna að viðhalda „gæfuríkum vinskap“ þeirra. „Við erum bestu vinir sem ákveðið hafa að hætta að vera kærustupar,“ segja þau í yfirlýsingunni.

„Undir eðlilegum kringumstæðum hefðum við reynt að gera sem minnst úr skilnaðinum en þar sem slúðurpressan sleppir aldrei góðu tækifæri til að velta vöngum og skálda, þá vildum við bara leggja öll spilin á borðið.“

Aniston, sem er 49 ára, og Theroux, sem er 46 ára, giftu sig í leynilegri athöfn í Los Angeles í ágúst árið 2015. Brúðkaupsveislan sjálf fór svo fram í villu í Bel Air. Þau höfðu verið par í um fjögur ár áður en þau ákváðu að gifta sig.