Curry setti met er Warriors pakkaði Cleveland saman

Meistarar Golden State Warriors eru komnir í 2-0 í úrslitaeinvígi NBA-deildarinnar gegn Cleveland Cavaliers. Warriors vann örugglega í nótt, 122-103.

Stephen Curry setti met í úrslitaeinvígi NBA-deildarinnar með því að skora níu þriggja stiga körfur í nótt. Hann endaði með 33 stig og 8 stoðsendingar. Fimm af þristunum níu komu í síðasta leikhlutanum.

„Það er ansi svalt að hafa nælt í þetta met. Á endanum snýst þetta samt allt bara um sigurinn. Þetta var samt sérstakt kvöld. Vonandi verða næstu leikir líka sérstakir og við nælum í tvo sigra í viðbót,“ sagði Curry.

Stephen Curry (33 PTS, 8 AST, 7 REB) knocked down an #NBAFinals record 9 3-pointers to fuel the @warriors Game 2 win! #DubNationpic.twitter.com/3Yv8M0RX0t

— NBA (@NBA) June 4, 2018

Curry sagði að hans menn hefðu farið vel yfir leik 1, sem þeir unnu naumlega, og lært af honum.

„LeBron var ótrúlegur í þeim en við vorum samt ekki nógu grimmir. Við bættum varnarleikinn núna en við getum enn bætt okkur.“

Kevin Durant skoraði 26 stig fyrir Warriors í leiknum og Klay Thompson bætti 20 við.

LeBron James var frábær í liði Cleveland eins og vanalega. Skoraði 29 stig, gaf 13 stoðsendingar og tók 9 fráköst. Kevin Love næstur með 22 stig og 10 fráköst.

Næstu tveir leikir einvígisins fara fram í Cleveland.