Umfjöllun og viðtöl: Stjarnan - FH 2-0 │Stjarnan í bikarúrslit

Stjarnan vann frábæran sigur á FH í undanúrslitum Mjólkubikars karla í kvöld en leikurinn fór 2-0 og fór fram á Samsung-vellinum í Garðabæ. 1472 áhorfendur mættu á leikinn og var mikil stemning allan tímann.

Guðjón Baldvinsson og Guðmundur Steinn Hafsteinsson gerðu mörk Stjörnunnar í kvöld en heimamenn voru betri aðilinn í leiknum og eru heldur betur líklegir að fara alla leið í úrslitaleiknum þann 15. september.

Af hverju vann Stjarnan?

Þeir voru heilt yfir sterkari í leiknum og nýttu sín færi vel. Varnarleikur liðsins var mjög góður og Haraldur Björnsson var virkilega flottur í marki Stjörnunnar. Stjörnumenn eru greinilega heitari um þessar mundir og sjálfstraustið meira. Það hafði mikil áhrif á leik liðsins og að sama skapi eru FH-ingar í dimmum dal og það sást einnig.

Hverjir stóðu upp úr?

Haraldur Björnsson var gríðarlega traustur í markinu hjá heimamönnum og gaf gott fordæmi fyrir vörn Stjörnunnar. Guðjón Baldvinsson barðist gjörsamlega eins og ljón allan tímann og voru varnarmenn FH í vandræðum með hann. Síðan var Eyjólfur Héðinsson frábær á miðjunni hjá Stjörnunni. FH-ingar voru ekki beint lélegir í kvöld en það virðist vanta töluvert upp á hjá liðinu og enginn einn leikmaður stóð upp úr.

Hvað gekk illa?

FH verður að gera eitthvað mikið í hvernig þeir nálgast föst leikatriði andstæðinganna, því það sem þeir eru að gera í dag er alls ekki nægilega gott. Einbeitingarleysi virðist þjaka liðið í þessari stöðu. Svo verður liðið að skapa sér mun fleiri færi en nýta í það minnsta færin sem þau fá.

Hvað gerist næst?

Það sem tekur við hjá FH er bara að reyna allt hvað liðið getur til að koma sér í baráttuna um Evrópusætið. Stjarnan er á leiðinni í bikarúrslit og á liðið enn möguleika á titlunum stóru.

Rúnar: Allt er þegar þrennt er„Þetta var bara hrikalega flott hjá drengjunum og frábær frammistaða hjá þeim í einu og öllu,“ segir Rúnar Páll Sigmundsson, þjálfari Stjörnunnar, eftir sigurinn á FH í kvöld. 

„Öflugur varnarleikur og góður sóknarleikur var lykillinn af okkar sigri í kvöld. Það gekk bara allt upp hjá okkur í dag.“

Rúnar segist hafa séð að FH-ingar myndu spila með þriggja manna vörn fyrir leikinn í kvöld.

„Það hefur gengið mjög vel hjá okkur í sumar að mæta þriggja manna vörn og við vissum nákvæmlega hvernig við myndum spila og lokuðum vel á þá,“ segir Rúnar en Stjarnan hefur í tvígang komist  í bikarúrslit og aldrei unnið.

„Það er allt er þegar þrennt er og klárum þennan titil loksins núna.“

Ólafur: Eistun skreppa bara upp í maga „Ég var að spyrja af hverju það sé flaggað á okkur þegar Jákup kemst einn í gegn í fyrri hálfleik,“ segir Ólafur Kristjánsson, þjálfari FH, eftir tapið í kvöld en hann ræddi lengi við dómara leiksins eftir leikslok og var ekki sáttur.

„Þarna er komin upp staða þar sem Jákup er ekki í refsiverðri rangstöðu. Aðstoðardómarinn lyftir upp flagginu og Pétur [Guðmundsson, dómari leiksins] hoppar á það. Svo er bara segja menn við mig eftir leik að þeir haldi að þetta hafi verið rangstæða. Þetta er bara gjörsamlega óþolandi að lenda í svona aftur og aftur, að fá svona dómgæslu á móti sér. Hann dæmdi leikinn svosem ágætlega fyrir utan þetta.“

Óli segir að FH liðið hafi bara ekki efni á því að fá svona hluti á móti sér.

„Auðvitað er pirringur í mér núna út af því að við vinnum ekki leikinn,“ segir Ólafur sem vill ekki meina að dómgæslan sé léleg á Íslandi heilt yfir. FH fékk enn eitt markið á sig úr föstu leikatriði í kvöld.

„Eistun skreppa bara upp í maga þegar við fáum á okkur fast leikatriði. Þegar það kemur bolti inn í teig, þá verðum við að ráðast á hann og koma honum út úr teignum. Svo einfalt er það. Það er bara helvítis brekka og skafl fyrir framan okkur og við verðum að fara gera eitthvað.“