Erdogan fylgist náið með máli blaðamannsins

Recep Tayyip Erdogan, forseti Tyrklands, segist hafa verið farinn að fylgjast með máli blaðamannsins Jamal Khashoggi þegar fréttir þess efnis að hann hefði verið myrtur voru birtar í gær. Lögreglan í Tyrklandi telur að Khashoggi hafi verið myrtur á ræðismannsskrifstofu heimalands síns.

Sjá einnig: Blaðamaður talinn hafa verið myrtur á ræðismannsskrifstofu heimalands síns



Khashoggi var sjálfstætt starfandi blaðamaður og hafði dvalið í Bandaríkjunum en unnusta hans er frá Tyrklandi. Hann hafði skrifað greinar sem gagnrýndi stjórnvöld í Sádí-arabíu og er því talið að yfirvöld þar í landi beri ábyrgð á hvarfi hans sem og mögulegu morði. Sendiráðið segist ekki bera ábyrgð á hvarfi blaðamannsins.



Erdogan sagði í samtali við fjölmiðla að yfirvöld í landinu væru að skoða myndbandsupptökur og gögn frá flugvöllum í tengslum við hvarf Khashoggi en hann hvarf í síðustu viku þegar hann hugðist sækja skjöl á skrifstofuna svo hann gæti kvænst unnustu sinni.

„Allar ferðir í sendiráðið, flugvallargögn og myndbandsupptökur eru undir eftirliti og verið að skoða það. Við viljum fá niðurstöður eins fljótt og auðið er,“ sagði Erdogan og bætti við að hann væri jákvæður á að Khashoggi myndi finnast á lífi.