Kvika kaupir GAMMA á 2,4 milljarða

Kvika banki og hluthafar GAMMA Capital Management hafa undirritað samning um kaup og sölu á öllu hlutafé GAMMA. GAMMA verður dótturfélag Kviku eftir kaupin og nemur kaupverðið 2,4 milljörðum króna. Þetta kemur fram í tilkynningu sem Kvika sendi Kauphöll Íslands í nótt.

„Viðskiptin eru háð samþykki eftirlitsaðila og samþykki hluthafafundar Kviku. Með breyttu eignarhaldi myndast enn frekari tækifæri í starfsemi GAMMA sem verður eftir kaupin dótturfélag Kviku. Markmið Kviku með kaupunum er að styrkja bankann enn frekar á sviði eigna- og sjóðastýringar,“ segir í tilkynningunni.

Viljayfirlýsing Kviku og GAMMA um kaup og sölu á öllu hlutafé GAMMA var undirrituð í júní síðastliðnum. Þá nam eigiðfé GAMMA 2.084 milljónum króna. Miðað við bókfært virði árangurstengdra þóknana í lok júní 2018 nemur kaupverðið 2.406 milljónum króna og skiptist með eftirfarandi hætti:

1. Reiðufé að fjárhæð 839 milljónum króna sem greiðist við frágang viðskiptanna.
2. Hlutdeildarskírteini í sjóðum GAMMA samtals að verðmæti 535 milljónir króna.
3. Árangurstengdar greiðslur, sem metnar eru á um 1.032 milljónir króna m.v. stöðu GAMMA í lok júní 2018 og greiðast þegar langtímakröfur á sjóði GAMMA innheimtast.

Hluthafar GAMMA munu auk þess eiga rétt til aukinna greiðslna vegna árangurstengdra þóknana fasteignasjóða félagsins. Kaupverðið á GAMMA getur jafnframt tekið breytingum til hækkunar eða lækkunar eftir því hvernig rekstur og verðmæti eigna GAMMA þróast á næstu misserum.

Áætlað er að afkoma bankans fyrir skatta muni aukast um 300-400 milljónir króna á ári í kjölfar kaupanna. Ekki er gert ráð fyrir því að auka þurfi hlutafé Kviku vegna kaupanna. Yfirverð viðskiptanna ræðst af stöðu GAMMA við frágang viðskiptanna en samkvæmt mati Kviku er það áætlað um 850 milljónir króna.

Ármann Þorvaldsson, forstjóri Kviku, segir m.a. í tilkynningu að sameining starfsemi félaganna í London sé í burðarliðnum.

„Kaupin á GAMMA efla verulega eigna- og sjóðastýringu Kviku og auka umtalsvert vænta arðsemi bankans. Stefnt er að því að sameina starfsemi félaganna í London, sem mun skjóta styrkari stoðum undir erlenda starfsemi bankans. Starfsfólk GAMMA hefur náð eftirtektarverðum árangri í sjóðastýringu á undanförnum árum og það er mikill fengur fyrir Kviku að fá góðan hóp til liðs við sig.“

Þá er haft eftir Gísla Haukssyni, öðrum stofnenda GAMMA og stærsta eiganda félagsins, að löngu ferli sé nú að ljúka með kaupum Kviku á öllu hlutafé í GAMMA.

„Fyrir viðskiptavini GAMMA þá mun þjónusta félagsins eflast mjög með eignarhaldi Kviku, meðal annars verður félagið í stakk búið að veita ennþá öflugri þjónustu á erlendum vettvangi. Starfsmenn GAMMA hafa á síðustu árum unnið einstakt starf í að skila afburða ávöxtun fyrir viðskiptavini og við að auka eignir í stýringu og er ég sannfærður um að svo verður áfram. Óska ég Kviku til hamingju með kaupin.“

Valdimar Árnason, forstjóri GAMMA, segir kaupin munu styrkja GAMMA í þjónustu við viðskiptavini sína.

„Árangur GAMMA undanfarinn áratug er mikilsverður fyrir viðskiptavini, starfsmenn sem og hluthafa. Félagið er eitt öflugasta sjóðastýringarfélag landsins og rekur fjölbreytt sjóðaúrval sem er um 140 milljarðar króna að stærð. Við hjá GAMMA lítum stolt um öxl á þessum tímamótum og björtum augum til framtíðar.“