Launahækkun forsenda þess að hæft fólk fengist

Hefðu laun bankastjóra Landsbankans ekki verið hækkuð um 1,2 milljónir króna á mánuði árið 2017 hefði verið erfiðara að finna hæfustu manneskjuna í starfið. Þetta segir formaður bankaráðs Landsbankans sem telur að í saman­burði við aðra bankastjóra séu launin augljóslega ekki leiðandi og því hófleg upp á 3,8 milljónir króna á mánuði.

Bankaráð Landsbankans svaraði í gær erindi Bankasýslu ríkisins sem óskað hafði skýringa á 82 prósenta hækkun launa Lilju Bjarkar Einarsdóttur á tímabilinu 1. júlí 2017 til 1. apríl 2018. Bankaráðið ítrekar í svari sínu að í starfskjarastefnu bankans sé kveðið á um að laun skuli vera samkeppnishæf en ekki leiðandi. Í ljósi þess að laun annarra bankastjóra séu verulega hærri en Landsbankastjóra, þá hafi launaákvarðanir verið í samræmi við þá stefnu.

Aðspurð hvort óttast sé að missa bankastjórann ef ekki sé hægt að bjóða honum það sem álitið er samkeppnishæf laun í þessu samhengi segir Helga Björk Eiríksdóttir, formaður bankaráðs, að starfskjarastefnan snúist um að laða að sér hæfasta starfsfólkið.

„Þess vegna er talið eðlilegt að við greiðum samkeppnishæf laun, en ekki leiðandi,“ segir Helga Björk.

Steinþór Pálsson, forveri Lilju Bjarkar í bankastjórastóli, var um tíma með lægri laun en undirmenn hans og margfalt lægri laun en aðrir bankastjórar.

Hann og bankaráðið gerðu ítrekaðar athugasemdir við kjörin, sem þá heyrði undir kjara­ráð, en þrátt fyrir þetta starfaði Steinþór í sex og hálft ár sem bankastjóri. Þar varð enginn atgervisflótti. En er staðan öðruvísi núna?

Helga Björk segir að vonir hafi staðið til að það tæki styttri tíma að færa ákvörðunarvald launa frá kjararáði til stjórnanna.

„Það er síðan tilviljun að við erum í ráðningarferli þegar lögunum er breytt. Það setti okkur auðvitað þrengri ramma. Við auglýstum eftir nýrri manneskju og sáum það að við gætum kannski ekki ráðið hæfasta fólkið ef það teldi sig vera að fá laun sem væru undir framkvæmdastjórum bankans og langt undir samanburðarfyrirtækjum eins og Íslandsbanka og Arion banka á þeim tíma. Þess vegna var þetta erfið ákvörðun og við þurftum að taka þetta í skrefum. Við litum svo á að við værum að nálgast starfskjarastefnuna í ársbyrjun 2017 og að 3,25 milljónir á mánuði væri að koma til móts við hana, væri hóflegt og alls ekki leiðandi,“ segir Helga Björk. Tíu mánuðum síðar kom til önnur launahækkun upp á 550 þúsund krónur á mánuði líkt og greint hefur verið frá.  

Aðspurð um árlega endurskoðun launa bankastjórans 1. apríl næstkomandi segir Helga Björk að vel geti verið að starfskjarastefnan breytist á komandi aðalfundi bankans, áður en til þeirrar endurskoðunar komi.