Fékk heilahristing og hélt að árið væri 1976

Að fá heilahristing er ekkert grín og nú hefur enski landsliðsmaðurinn Michael Keane, leikmaður Everton, deilt reynslu sinni af því að fá heilahristing.

Keane hefur tvisvar sinnum fengið heilahristing á ferli sínum. Í leik gegn Bournemouth í fyrra brákaðist höfuðkúpa hans og svo fékk hann olnboga í höfuðið er hann lék með Burnley. Þá fékk hann mjög alvarlegan heilahristing.

„Læknirinn spurði mig hvaða dagur væri en þetta átti sér stað í mars. Ég svaraði að það væri október árið 1976. Ég var alveg farinn og þetta var ógnvekjandi,“ sagði Keane.

„Ég hélt samt áfram að spila í 15 mínútur og á endanum varð ég að setjast niður. Þá vissi ég ekki einu sinni hvar ég var.“