Robert Mugabe er látinn

Robert Mugabe fyrrum forseti Zimbabve er látinn níutíu og fimm ára að aldri. Mugabe hafði verið á spítala í Singapore síðan í apríl en honum var komið frá völdum í Zimbabve af hernum árið 2017 eftir þrjátíu og sjö ára setu á valdastóli.

Fyrst á valdatíð forsetans var Mugabe hampað fyrir að bæta heilbrigðis- og menntakerfi afríkuríkisins sem var sett á laggirnar árið 1980 eftir fimmtán ára blóðugt borgarastríð en áður hét ríkið Ródesía og var stjórnað af hvítum. Hann var fyrst kjörinn forsætisráðherra en lagði síðan það embætti niður og tók við embætti forseta.

Sjá einnig: Upprisa og fall Mugabe - Kennari, uppreisnarmaður, frelsishetja, harðstjóri

Fljótlega fór þó að síga á dökku hliðina og varð Mugabe að einskonar táknmynd fyrir hinn dæmigerða spillta einræðisherra Afríku.