Sveppi rifinn í sundur í grófari útgáfu af myndbandi DJ Muscleboy

Tónlistarmaðurinn Egill Einarsson sem gengur undir nafninu DJ Muscleboy gaf út nýtt tónlistarmyndband við lagið Muscle Club fyrir tæplega viku og sló það strax í gegn. Nú er komin út ný og grafískari útgáfa.

Landsliðsmarkvörðurinn Hannes Þór Halldórsson leikstýrði myndbandinu og koma þar fram margar stórstjörnur hér á landi.

Þeir sem koma meðal annars fram í myndbandinu eru Björn Hlynur Haraldsson, Jóhannes Haukur Jóhannesson, Magg Bess, Sveppi, Hafþór Júlíus Björnsson, Ívar Guðmundsson, Arnar Grant, Auðunn Blöndal, Óli Geir og nánast allir Íslendingar sem tengjast vaxtarræktar og fitness bransanum.

Hér að neðan má sjá nýja útgáfu myndbandsins. 

Eins og áður segir leikstýrir landsliðsmarkvörðurinn Hannes Þór Halldórsson myndbandinu og má sjá myndband hér að neðan sem sýnir bakvið tjöldin við gerð myndbandsins. Hvernig þetta fór allt saman fram.

Við gerð myndbandsins var Mjölni breytt í risastóran vöðvaklúbb og yfir 80 manns tóku þátt í því. Muscleboy fær stórsöngvarann Sverri Bergmann með sér í lið, en hann söng einmitt líka í laginu Summerbody sem kom út í sumar.

Svo virðist sem meðlimir í Muscle Club safni saman öllum þeim sem eru í yfirþyngd og drekki sjeik sem búinn er til úr þeim. Sverrir Þór Sverrisson verður fyrir barðinu á blandaranum í myndbandinu en Vísir frumsýnir í dag nýja útgáfu af myndbandinu sem er ekki ætluð börnum og er bönnuð innan 16 ára. Þar má sjá þegar Sveppi er rifinn í sundur og settur í blandara til að útbúa sjeikinn.

Þetta er ekki í fyrsta skipti sem Hannes Þór Halldórsson og þeir félagar Egill Einarsson og leikarinn Björn Hlynur Haraldsson vinna saman. Fyrir nokkrum árum síðan fóru Auddi og Sveppi í svokallað trailer-keppni í þættinum sínum á Stöð 2. Auddi fékk þá Hannes, Egil og Björn Hlyn með sér í lið og úr varð trailer fyrir ímynduðu myndina Leynilögga. Útkoman var sprenghlægileg og má sjá hana hér fyrir neðan.