Tíu pör taka þátt og stendur eitt par eftir sem sigurvegari í lok janúar á næsta ári.
Næstu fimm daga verða öll pörin í Allir geta dansað kynnt til leiks og er komið að því að kynna dansparið Ólaf Örn Ólafsson og Mörtu Carrasco.
Ólafur er helst þekktur fyrir hæfileika sína í eldhúsinu og hefur hann vakið athygli fyrir fína kokkaþætti. Hann starfar á því sviði og einnig sem veitingarmaður. Ólafur slasaðist nokkuð illa á fæti á dögunum og var lengi að geta byrjað að æfa. Hann er í raun nýbúinn að losna við spelkur og nú eru æfingar aftur á móti hafnar á fullu og er Marta að kenna honum extra hratt og fagmannlega.
Marta Carrasco er nýliði í hópi fagdansara og því þarf hún að sanna sig algjörlega frá grunni. Það er því mikið undir í fyrsta þættinum hjá þessum glaðlynda pari. Bara spurning hvort Ólafur verði heill fyrir föstudaginn og hvort Marta nái að kenna honum atriðið nægilega vel.
Dómarar í ár verða þeir sömu og í fyrstu seríunni:
• Selma Björnsdóttir
• Karen Reeve
• Jóhann Gunnar Arnarson
Vilhelm Gunnarsson ljósmyndari Vísis leit við á æfingu hjá Ólafi og Mörtu í World Class í vikunni og fangaði stemninguna hjá dansparinu.
