Daði á Airwaves: „Get ekki beðið eftir að sýna ykkur hvað ég er búinn að vera að gera“

Daði Freyr kemur fram á Iceland Airwaves í ár eins og segir í tilkynningu frá tónlistarhátíðinni.

Daði Freyr og Gagnamagnið áttu að koma fram fyrir Íslands hönd í Eurovision í ár en keppninni var aflýst.

Lagið Think About Things hefur aftur á móti slegið í gegn um alla Evrópu síðustu vikur.

Lagið fór eins og eldur um sinu á internetinu og stórstjörnur á borð við Russell Crowe, Jennifer Garner, P!nk og James Corden deildu laginu og dásömuðu það, tónlistarunnendur um allan heim hafa lofað lagasmíðina og Airwaves vinirnir Hot Chip (ein uppáhalds hljómsveit Daða) endurblönduðu lagið eftir eigin höfði.

Daði fer í tónleikaferðalag erlendis í desember.

„Ég get ekki beðið eftir að koma fram á uppáhalds tónlistarhátíðinni minni. Það er eitthvað sérstakt við Iceland Airwaves, „ segir Daði Freyr.

„Get ekki beðið eftir að sýna ykkur hvað ég er búinn að vera að gera."