Slógust eftir lokaflautið og fengu báðir rautt

Það varð allt vitlaust eftir lokaflautið gall í leik Derby og Reading í ensku B-deildinni í knattspyrnu í gær en þeim Tom Lawrence og Matt Miazga var ansi heitt í hamsi.

Derby hafði 2-1 betur í leik liðanna á Pride Park í gær en lánsmaðurinn frá Chelsea, Miazga, virtist eiga upphafshöggið í gær er hann tók utan um háls Lawrence sem skoraði fyrsta mark Derby í leiknum.

Það kveikti vel í Lawrence og þeir slógust í dágóðan tíma en Lawrence virtist einnig skalla í átt að Miazga. Samherjar þeirra beggja komu svo hlaupandi og skildu þá í sundur.

Þeir kenndu svo hvor öðrum um en þeir fengu báðir að líta rauða spjaldið þrátt fyrir að leiknum væri lokið fyrir þessa óæskilegu hegðun.