Maguire ekki lengur í enska hópnum sem kemur til Íslands

Gareth Southgate, þjálfari enska landsliðsins í knattspyrnu, hefur dregið Harry Maguire úr enska landsliðshópnum.

Enski miðvörðurinn hefur verið mikið í fréttum undanfarna daga eftir að hann var handtekinn fyrir helgi á Grikklandi.

Maguire var handtekinn á Mykonos þar sem hann hafði verið í fríi og í dag var hann dæmdur í skilorðsbundið fangelsi.

Southgate hefur því ákveðið að draga Maguire úr hópnum en hann hafði verið valinn í enska hópinn fyrst um sinn.

Enski þjálfarinn segir í yfirlýsingu sinni að hann hafi tekið ákvörðun sem væri öllum fyrir bestu og hún væri í samráði við Man. United.

England mætir Íslandi laugardaginn 5. september og þremur dögum síðar spila þeir við Danmörku á Parken.