Spurning vikunnar: Hefur þú heyrt um sambandsformið fjölástir (polyamory)?

Að fá að elska þau sem þú vilt á þann hátt sem þú vilt er líklega ein besta útskýringin á því hvað fjölástir eru. Fjölástir snúast ekki um kynlíf eins og swing-senan, heldur ást og tilfinningar. 

Þetta sambandsform virkar þannig að þú getur verið í sambandi með fleirum en einum aðila í einu en grundvallaratriðið er opin og upplýst samskipti.

Fjölástarsambönd geta verið með ýmiskonar útfærslu. Ein manneskja getur átt marga kærasta eða kærustur án þess að þeir aðilar séu í sambandi. Einnig geta fleiri en tveir verið í sama sambandinu.

Fólk ákveður reglur fyrir sín sambönd og mikilvægt er að það sé í fullu samráði við alla aðila. Framhjáhald er skilgreint sem brot á þeim reglum sem þú gerðir við það fólk sem þú ert í sambandi með.

Í síðustu viku tóku Makamál viðtal við konu sem er í fjölástarsambandi (polyamory) og sagði hún æ fleiri Íslendinga kjósa þetta sambandsform.

Hún er gift manni sínum til margra ára en býr ekki með honum, hann býr með kærustu sinni. Sjálf á hún kærasta, sem hún býr ekki með, og nokkra elskhuga.

Að þessu sinni spyrjum við því lesendur Vísis um fjölástir.