Stóð í skilnaði, rándýru dóms­máli og bjó í barna­her­bergi

Sigmar sló fyrst í gegn í þáttunum 70 mínútur á Popp Tíví um aldamótin og hefur síðan þá verið þjóðþekktur einstaklingur hér á landi. Í dag á hann nokkra veitingastaði og hefur gert það gott á því sviði.

Sigmar opnaði Fabrikkuna ásamt Jóhannesi Ásbjörnssyni og Skúla Gunnari Sigfússyni, oftast kenndur við Subway, árið 2010. Í kjölfarið fór hann í rekstur á fleiri veitingastöðum á borð við Shake & Pizza í Keiluhöllinni og á í dag hlut í Barion-stöðunum, Hlöllabátum og Minigarðinum.

Var að missa vin

En samstarf hans og Skúla Gunnars endaði ekki vel og hefur Sigmar verið í áralöngum lagadeilum við hann sem hafa staðið yfir í fjögur ár og það ferli hefur tekið sinn toll. Sigmar hefur eytt 26 milljónum í dómsmálin sem hafa farið fram og til baka í dómskerfinu. Hann segist stundum sjá eftir því að hafa farið í mál, en hugsar líka til þess að hann hefði líklega alltaf séð eftir því, ef hann hefði sleppt því. Sigmar segist ekki bara hafa verið sár að upplifa sig svikinn heldur einnig að þarna var hann að missa vin.

„Ég held að það sé ekki hægt að dvelja við þá hugsun að sjá eftir hlutum og vera velta þeim fyrir sér ef og hefði í þessu,“ segir Simmi en Skúli var sýknaður í Landsrétti í október. Hann segir málinu ekki enn lokið. Sigmar hafði áður unnið málið á öðru dómsstigi.

„Þetta er svona mál sem ég hugsa ekkert um nema þegar ég þarf að taka fund með lögmönnum mínum og fara yfir þetta. Þá er það bara helvíti leiðinlegur dagur.“

Þessi fjögur ár hafa verið bæði góð og erfið hjá Sigmari en á því tímabili gekk hann í gegnum skilnað við barnsmóður sína en saman eiga þau þrjá drengi.

„Það má segja það að allir mælikvarðar hafi þarna verið settir á hvolf, allt norm hafi verið snúið á hvolf á þessum tíma. Auðvitað fylgir því ákveðið álag. Ég sel síðan þarna mína hluti í Keiluhöllinni og Fabrikkunni og var ekki að deila framtíðarsýn með mínum meðeigendum þá. Það ár sem tók við eftir það var erfitt ár, þó ég hafi ekkert endilega tæklað það. Það kom bara tómarúm sem ég fyllti upp í með ansi mörgum utanlandsferðum og maður í raun flúði bara aðstæðurnar heldur en að tækla þær.“

Sorgarferli

Eftir skilnaðinn flutti Sigmar út úr húsi þeirra hjóna og fannst honum skipta mestu máli að rammi drengjanna yrði eins eðlilegur og hægt væri. Sigmar þurfti því að finna sér húsnæði í hverfinu en það tók tíma. Á meðan fékk hann að búa inni í barnaherberginu hjá góðvini sínum.

„Eins og það var yndislegt að búa hjá vini mínum og ekki ætla ég að gera lítið úr því, en þetta var tímabil þar sem maður kemur heim úr vinnu og kemur ekki inn á heimilið sitt og öll rútína sem maður er vanur er bara farin. Það voru oft erfið kvöld að takast á við og ég fann það, og ég held að margir finni það sem fara í gegnum skilnað að tilfinningin að fara í einhverjar áttir sem eru ekki hollar er sterk. Maður varð svolítið að berjast við það og halda fókus. Skilnaður yfirhöfuð er sorgarferli, þetta er alveg tveggja ára sorgarferli þó að ákvörðunin sé rétt.“

Í þættinum hér að ofan ræðir Simmi Vill um upphafið á fjölmiðlaferli sínum, veitingabransann og það hvernig er að reka veitingastaði í miðju Covid, um fráfall föður hans seint á síðasta ári, þristamúsina frægu, framtíðina og svo margt fleira.