Haukur ætlaði að streyma gaml­árs­­tón­­leikum heima í stofu en tók síðan u-beygju

Gleðin verður send út án endurgjalds á Vísi og Stöð 2 Vísi og hefst klukkan 00:45 á gámlárskvöld og stendur til klukkan þrjú.

„Eins og einhverjir hafa eflaust frétt af hélt ég tónleika um Verslunarmannahelgina fyrir utan heimili okkar fjölskyldu á Garðastöðum og vakti það mikla lukku og fékk mikla umfjöllun og dreifingu á samfélagsmiðlum,“ segir Haukur Einarsson  eigandi HVE viðburða sem stendur meðal annars fyrir tónleikunum.

„Ég vildi endurtaka leikinn um áramótin þar sem fyrirséð er að takmarkað verði um böll. Við ætlum að leggja áherslu á bestu lögin í fullum gæðum. Einnig langað mér að fá nokkra fræga gesti að koma í partýið til að syngja nokkur lög og allt kostar þetta einhverjar krónur. Ég vissi strax að kostnaður við svona tónleika væri mikill. Ég reyndi að fá fyrirtæki hér í Grafarvogi til að kosta giggið en það gekk frekar illa. Rétt fyrir jól hitti ég Kristmund eiganda Bílastjörnunnar og var hann fullur bjartsýni og þróaðist giggið þannig að hann mun halda það í sýnu húsnæði og kosta tónleikana að mestum hluta.“

Fram koma söngvararnir Eyjólfur Kristjánsson, Gunnar Ólason úr Skítamóral, Regína Ósk og Svenni Þór ásamt einvala liði hljóðfæraleikara. Ingólfur Sigurðsson – trommur, Haukur Viðar Einarsson – bassi, Birgir Þórisson – hljómborð og Pétur Valgarð Pétursson – gítar.

Með tónleikunum vill sveitin hvetja fólk til að styðja Björgunarsveitina Ísólfur á Seyðisfirði með því að leggja inn á eftirfarandi reikning:

Banki: 176-26-5157

Kennitala: 580484-0349