Æfa tvisvar í viku, eignuðust bjórkæli og fá nú Mourinho og hans menn til Krossabæjar

Fótboltaheimurinn beinir sjónum sínum í dag að Krossabæ (e. Crosby), í úthverfi Liverpool. Þar tekur Marine á móti Tottenham kl. 17. Samkomureglur vegna kórónuveirufaraldursins koma í veg fyrir að 500 stuðningsmenn fái stóran draum uppfylltan með því að mæta á þennan stærsta leik í sögu Marine, en 6.000 sýndaraðgöngumiðar hafa þó selst til stuðnings smáliðinu sem komið er svo langt.

Þriðja umferð bikarkeppninnar er sú fyrsta sem að Tottenham og önnur úrvalsdeildarlið spila í ár hvert. Marine, sem leikur í áttunda þrepi deildakeppninnar á Englandi, hefur hins vegar þurft að fara í gegnum fimm umferðir í undankeppni, og svo slá út D-deildarlið Colchester og utandeildarlið Havant & Waterlooville til að komast í þriðju umferðina.

Sigrinum gegn Havant var vel fagnað í búningsklefanum og markmaðurinn Bayleigh Passant skaust í næstu búð og keypti bjór fyrir mannskapinn, enn í markmannsbúningnum. Bjórframleiðandinn Budweiser hreifst af þessu og útvegaði Marine-mönnum kæliskáp í vikunni, fullan af bjórflöskum. Þeir fá ársbirgðir af bjór, sama hvernig fer í dag, og stuðningsmenn Marine hafa einnig fengið sendingu frá bjórframleiðandanum fyrir þennan tímamótaleik í sögu félagsins.

Leikmenn og aðrir sem tengjast Marine hafa einmitt fundið fyrir miklum áhuga fjölmiðla og annarra eftir að liðið dróst svo gegn Tottenham. Viðtalsbeiðnir hafa borist frá Spáni, Bandaríkjunum, Finnlandi, Danmörku og jafnvel Rússlandi og Ástralíu.

Einn á móti milljón en það gæti dugað

„Það sagði einhver við mig að þetta væri ekki bara leikur í ensku bikarkeppninni – þetta væri enska bikarkeppnin í sinni tærustu mynd,“ sagði Paul Leary, formaður Marine, við Daily Mail og bætti við: „Þetta er ótrúlegt, ekki satt? En dásamlegur tími fyrir félagið.“

Niall Cummins er framherji Havant og skoraði einmitt sigurmark á síðustu stundu, í leiknum gegn Havant sem fór í framlengingu og endaði 1-0. Hann er staðráðinn í að njóta dagsins:

„Svona tækifæri fær maður bara einu sinni á ævinni og við ætlum að nýta það til fulls og reyna að ná góðum úrslitum,“ sagði Cummins. „Þó að líkurnar séu einn á móti milljón þá verðum við að muna að við gætum verið þessi „eini“,“ bætti hann við.

Enska bikarkeppnin, FA Cup, er á Stöð 2 Sport en upplýsingar um útsendingar má finna hér. FA Cup er hluti af Stöð 2 Sport erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.