Aftur markalaust hjá Chelsea og Man Utd

Það var stál í stál þegar Chelsea og Manchester United mættust í stórleik dagsins í ensku úrvalsdeildinni.

Fyrri leikur liðanna á tímabilinu endaði með markalausu jafntefli í hrútleiðinlegum leik á Old Trafford og leikur dagsins var ekki mikið skárri ef horft er til skemmtanagildis.

Mest umtalaða atvikið úr fyrri hálfleiknum var þegar gestirnir kölluðu eftir vítaspyrnu þegar boltinn fór í hönd Callum Hudson Odoi innan vítateigs Chelsea. Dómarinn skoðaði atvikið í VAR en ákvað að dæma ekkert.

Óhætt er að segja að ekkert markvert hafi gerst í síðari hálfleiknum enda fór svo að leiknum lauk með markalausu jafntefli, 0-0.