Pepsi Max-spáin 2021: Gamlir en enn góðir

Íþróttadeild Vísis og Stöðvar 2 Sports spáir að venju fyrir um gengi liðanna í Pepsi Max-deild karla með árlegri spá sinni fyrir mótið. Keppni í deildinni hefst með leik Vals og ÍA föstudagskvöldið 30. apríl. Valsmenn eiga titil að verja en þeir urðu Íslandsmeistarar í 23. sinn í sögu félagsins í fyrra.

Íþróttadeild spáir KR 4. sæti Pepsi Max-deildarinnar í sumar og að liðið fari upp um eitt sæti frá síðasta tímabili.

Titilvörnin var nokkuð endaslepp hjá KR-ingum í fyrra. KR byrjaði reyndar vel en síðan fjaraði undan liðinu. Slæmur árangur á heimavelli, sérstaklega gegn lakari liðum deildarinnar, kom í veg fyrir að KR-ingar blönduðu sér í toppbaráttuna. Þeir enduðu að lokum í 5. sæti og misstu af Evrópusæti.

Rúnar Kristinsson er að hefja sitt fjórða tímabil með KR eftir að hann sneri aftur heim eftir dvöl í Noregi og Belgíu. Hefur þrisvar sinnum gert KR að Íslandsmeisturum og þrisvar sinnum að bikarmeisturum. Er einn af bestu sonum KR og tilbeðinn í Vesturbænum.

Nokkuð hefur kvarnast úr leikmannahópi KR í vetur, fáir komið og breiddin er ekki jafn mikil og oft áður. Byrjunarliðið er samt sterkt og óhemju reynt. KR-ingar vonast svo til að yngri leikmenn á borð við Stefán Árna Geirsson og Ægi Jarl Jónasson geri sig enn meira gildandi og stimpli sig inn með lykilmenn.

Síðasta tímabil hjá KR

Liðið og lykilmenn

Kristinn Jónsson (f. 1990): Að öllum líkindum besti vinstri bakvörður deildarinnar og án alls efa einn besti leikmaður deildarinnar sömuleiðis. Hefur myndað ógnarsterkan vinstri væng KR-liðsins ásamt Óskari Erni undanfarin ár og mun gera áfram en Kristinn skrifaði nýverið undir nýjan samning sem gildir til 2023. Lagði upp fjögur mörk á síðustu leiktíð, þar af þrjú gegn ÍA. Ætlar sér eflaust að hrella fleiri lið en Skagamenn í sumar. 

Pálmi Rafn Pálmason (f. 1984): Magnaður miðjumaður sem hefur verið hjá KR síðan 2015. Svo góður hefur hann verið í svörtu og hvítu að Vesturbæingar hafa fyrirgefið honum fyrir að spila með Val á sínum tíma. Eftir að hafa skorað töluvert af mörkum bæði 2018 og 2019 hefur Pálmi færst aftar á völlinn og verður titlaður sem djúpur miðjumaður í sumar. Þar mun hann sjá um að stýra spilinu sem og leikmönnunum fyrir framan sig á meðan yngri leikmenn þurfa að axla ábyrgð í markaskorun.

Óskar Örn Hauksson (f. 1984): Leikjahæsti leikmaður efstu deildar frá upphafi. Er að nálgast fertugt og þó hraðinn sé örlítið minni en áður eru snerpan og skilningarvitin enn upp á tíu. Óskar Örn er eflaust sá leikmaður sem hugsar hvað best um sig enda missir hann varla úr leik vegna meiðsla. Þrátt fyrir að koma með beinum hætti að tíu mörkum (sex mörk, fjórar stoðsendingar) í tuttugu leikjum var hann ekki talinn eiga sérstakt tímabil fyrir ári. Það læðist að manni sú tilfinning að Óskar Örn ætli sér enn og aftur að sýna hvers hann er megnugur í sumar. 

Leikstíllinn

Í þremur orðum: Skipulagður, hraður og sókndjarfur.

Segja má að leikstíll KR sé nokkuð fastmótaður og verið það síðan Rúnar tók við liðinu. Í grunninn er um að ræða 4-2-3-1 leikkerfi með sókndjarfa bakverði, þétta miðju og framliggjandi miðjumann sem skorar töluvert. Mögulega gæti orðið breyting á í sumar ef Pálmi Rafn verður einn djúpur fyrir framan vörn liðsins. Það verður að koma í ljós.

Í markinu er Beitir lítið að flækja hlutina þegar kemur að uppspili. Ef það er mögulegt að gefa á miðvörð eða bakvörð þá fer boltinn þangað annars fer tuðran upp völlinn. Litlar áhættur eru teknar í uppspili fyrir framan markið.

Rúnar vill að lið sitt pressi ofarlega á vellinum og ætli mótherji þeirra sér að spila út frá marki má búast við svart hvítum treyjum allt í kringum vítateiginn. Á meðan orka leyfir er því pressað ofarlega á vellinum en ef liðið þarf að setjast aðeins aftar til að verja fenginn hlut þá er það ekki mikið vandamál.

Sóknarleikur KR-inga er fjölbreytilegur svo vægt sé til orða tekið. Liðið er skipulagt þegar kemur að skyndisóknum og getur breytt vörn í sókn á augabragði. Að sama skapi getur liðið einnig haldið boltanum, spilað kantanna á milli og fundið þannig glufur í vörn andstæðinga sinna. Oftar nær er það plássið milli bakvarðar og miðvarðar sem er nýtt til að skapa marktækifæri. 

Að lokum eru föst leikatriði einnig nýtt og vel æfð. Þá er athyglisvert hversu oft KR býr til góð marktækifæri eftir innköst ofarlega á vellinum.

Markaðurinn

KR-ingar hafa misst meira en þeir hafa fengið. Finnur Tómas verðskuldaði að komast í atvinnumennsku en það er einnig mikill missir af hinum fjölhæfa Pablo Punyed. Hlutverk Finns Orra var misstórt en hann var samt mikilvægur hlekkur í KR-liðinu.

Guðjón Baldvinsson er ekki að fara að skora eins mikið og þegar hann lék síðast með KR, fyrir áratug síðan, en þessi 35 ára orkubolti stækkar vopnabúrið í fremstu víglínu.

Grétar Snær Gunnarsson var svo mjög ljós punktur á slöku tímabili Fjölnis í fyrra. Þessi uppaldi Hafnfirðingur, sem varð Færeyjameistari undir stjórn Heimis Guðjónssonar árið 2018, byrjar tímabilið væntanlega í miðri vörn KR.

Hvað vantar? Kannski reynist Grétar hárrétta svarið en KR virðist helst geta grætt á að fá til sín hávaxinn úrvalsmiðvörð.

Að lokum

Markmiðið hjá KR er alltaf það sama, að berjast um þá titla sem í boði eru. Minnimáttarkennd er ekki til á þeim bænum. Eins og staðan er núna virðast KR-ingar þó standa bestu liðum deildarinnar aðeins að baki.

Það skyldi þó enginn vanmeta reynsluna og hæfileikana í KR. Liðið er mjög gamalt en líka mjög gott. Það er spurning hvort ein atlaga í viðbót að Íslandsmeistaratitlinum sé til staðar í leikmannahópnum. Ef Kjartan Henry Finnbogason bætist við hann gæti hann líka breytt miklu. Rúnar Kristinsson er svo auðvitað frábær þjálfari og einn sá besti í sögu efstu deildar. 

Ef KR ætlar að blanda sér í baráttuna um Íslandsmeistaratitilinn verður liðið að gera betur á Meistaravöllum en í fyrra. KR-ingar voru þriðja versta heimavallarárangurinn í Pepsi Max-deildinni og það er ekki í boði fyrir lið sem vill vera á toppnum. KR var þó mjög öflugt á útivelli, tapaði ekki leik þar og fékk aðeins á sig tvö mörk.