Neðri deildir Vodafonedeildarinnar í CS:GO hefjast í lok október

Hjörtur Leó Guðjónsson skrifar 1. október 2021 06:31

Neðri deildir Vodafonedeildarinnar í CS:GO hefjast 27. október.

Hinagð til hafa bestu lið landsinsí CS:GO mæst í Vodafonedeildinni þar sem að liðin etja kappi í þessum vinsæla fyrstu persónu skotleik. Nú eru að fara af stað neðri deildir Vodafonedeildarinnar þar sem að hverjir sem er geta skráð sig og tekið þátt.

Á heimasíðu Rafíþróttasambands Íslands kemur fram að raðað verði í deildir eftir styrkleika, og að leikið verði í átta liða deildum, en neðri deildirnar verða spilaðar frá 27. október til 2. mars.

Leikin verður tvöföld umferð, og allar viðureignir verða svokallaðar Bo3, sem þýðir að liðið sem er fyrra til að sigra tvö kort vinnur viðureignina.

Eins og áður segir verður liðunum raðað í deildir eftir styrkleika, en þau lið sem tóku þátt í Deildarforkeppninni fá efstu lausu sætin í neðri deildunum. Þau lið sem ekki tóku þátt í deildarforkeppninni eru röðuð eftir styrkleika, þar sem farið er eftir fyrri árangri í deildum og/eða meðal „elo“ leikmanna á Faceit.

Allar upplýsingar varðandi neðri deildir Vodafonedeildarinnar má nálgast inni á heimasíðu Rafíþróttasambands Íslands með því að smella hér.

Vodafone-deildin