Þórsarar bundu enda á ótrúlega sigurgöngu Dusty

Dusty og Þór hafa verið á toppi deildarinnar frá upphafi tímabilsins. Dusty hafði fram að þessum leik unnið alla sína leiki á tímabilinu, 12 talsins. Ef Dusty hefði betur væri liðið algjörlega búið að stinga Þór af og hafa betur í innbyrðis viðureignum liðanna. Það var því til mikils að vinna fyrir Þór þar sem sigur í leiknum var nánast eina vonarglæta liðsins vildi það eiga möguleika á sigri í deildinni. Vallea hafði á þriðjudaginn stillt sér upp við hlið þeirra og því farið að hitna undir Þórsurum. Fyrri leikur liðanna fór 16-13 fyrir Dusty í Vertigo og áttu Þórsarar því einnig harma að hefna.

Í gærkvöldi var förinni hins vegar heitið í Overpass kortið þar sem Þór hafði betur í hnífalotunni og byrjaði í vörn (Counter-Terrorists). Hóst þá þessi risaleikur sem aðdáendur CS:GO hafa lengi beðið eftir. Það var boðið upp á sýningu allt frá upphafi þegar Thor krækti í fyrstu lotuna fyrir Dusty með fjórfaldri fellu og snjöllum blekkingarleik við að koma sprengjunni niður. Thor tryggði Dusty næstu lotu en það var Bjarni sem kom Dusty í 3-0, aftur með fjórfaldri fellu og að koma sprengjunni fyrir.

En skjótt skipast veður í lofti. Þórsarar voru ekki lengi að skella í lás og jafna 3-3. Við það blómstraði efnahagur Þórsara sem unnu loturnar með marga menn á lífi á meðan Dusty menn voru blankir og illa vopnaðir. Og héldu Þórsarar þá áfram, voru hraðir og árásargjarnir og lokuðu hverri lotunni á fætur annarri snöggt og snyrtilega. Leikmenn Dusty reyndu ólík plön í sókninni en sama hvað þeir reyndu þá sáu Þórsarar við þeim. Iðulega voru það Þórsarar sem áttu fyrstu felluna í lotunum sem Allee fylgdi eftir á vappanum. Dusty voru því í meiri vandræðum en sést hefur lengi.

Sigurruna Þórs virtist engan enda ætla að taka og varð að lokum 11 lotur í röð. Hvar sem Dusty fór um kortið voru sjóðheitir Þórsarar tilbúnir til að taka á móti þeim og fella. Dabbehhh og Allee voru lang atkvæðamestir fyrir Þór á meðan Dusty tapaði hverju einvíginu á fætur öðru, eitthvað sem ekki mátti búast við. Síðasta lota hálfleiksins féll í hlut Dusty, aftur með fjórfaldri fellu frá Thor, en Dusty fóru í afar erfiðri stöðu inn í síðari hálfleikinn.

Staða í hálfleik: Þór 11 - 4 Dusty

Þórsurum leið væntanlega ágætlega þegar liðin skiptu um hlutverk í síðari hálfleik og hafði betur í fyrstu lotu sinni í sókninni. Vörn Dusty var aftur á móti virkilega sterk og um tíma fór að halla undan fæti hjá Þórsurum og þrátt fyrir ágætar tilraunir gekk hvorki né rak hjá þeim. Dusty lék eins og þeim er tamt, alltaf með menn í hjálpina og einstaklega hittnir. Kræktu þeir þannig í 5 lotur í röð til að minnka muninn í 12-9. Þórsarar lentu í kjölfarið í basli með efnahaginn og hlupu sífellt á sama vegginn: vörn Dusty.

Loks tókst Þór þó að vopnast ágætlega og það skilaði sínu. Var það í raun allt sem Þór þurfti til að koma sér aftur inn í leikinn og með stillingu, seiglu og á köflum örlítilli heppni dreifðu Þórsarar sér um kortið og unnu brutu bankann hjá Dusty. Þór vann þannig þrjár lotur í röð til að stilla Dusty upp við vegg, 15-9. Dusty svaraði þá aðeins með góðu samspili í 25. lotu og 4K frá leFluff í þeirri 26. Það reyndist of seint í rassinn gripið því Þórsarar lokuðu leiknum með planti á lokasekúndunum í næstu lotu.

Lokastaða: Þór 16 - 11 Dusty

Ekki bara var þessi leikur gríðarlega spennandi heldur hleypti hann spennu í deildina. Þór er nú einungis fjórum stigum á eftir Dusty á toppnum. Þór mætir Kórdrengjum þriðjudaginn 1. febrúar, og Dusty tekur á móti Vallea 4. febrúar. Sýnt verður frá leikjunum á Stöð 2 Esport og á Twitch síðu Rafíþróttasamtaka Íslands.