Ljósleiðaradeildin: Vallea klárar söguna og Tommi Nostradamus

Í fyrri viðureign kvöldsins mættust Vallea og SAGA þar sem Vallea vann mikilvægan sigur, 16-13. Sigurinn var mikilvægur fyrir liðið í toppbaráttunni, en liðið lyfti sér upp að hlið Þórs í annað sæti deildarinnar.

Það voru þeir Narfi og Minidegreez, liðsmenn Vallea, sem kláruðu viðureignina. Þetta var svo valið Elko tilþrif kvöldsins, en myndbrot af seinustu andartökum leiksins má sjá hér fyrir neðan.

Í seinni viðureign kvöldsins mættust Ármann og Þór þar sem Ármann vann nokkuð óvæntan sigur. Fyrir leik veltu þeir Tómas Jóhannsson og Kristján Einar Kristjánsson því fyrir sér hvaða kort yrði spilað og Tómas virtist vera með það allt á hreinu.

Tómas þuldi upp ástæður fyrir því af hverju hann héldi að Inferno yrði fyrir valinu áður en Kristján stoppaði félaga sinn og spurði hvort hann væri nokkuð Nostradamus.

Ljósleiðaradeildin í CS:GO heldur áfram annað kvöld á Stöð 2 eSport og hér á Vísi þegar XY mætir Fylki og botnlið Kórdrengja mætir toppliði Dusty.