Arsenal ekki í vandræðum með Alfons og félaga

Arsenal vann öruggan 3-0 sigur er liðið tók á móti Alfons Sampsted og félögum hans í norska meistaraliðinu Bodø/Glimt í Evrópudeild UEFA í kvöld.

Það var Edward Nketiah sem kom heimamönnum í Arsenal í forystu með marki á 23. mínútu eftir stoðsendingu frá Kieran Tierney áður en Rob Holding tvöfaldaði forystu liðsins fjórum mínútum síðar.

Ekki var meira skorað í fyrri hálfleik og staðan því 2-0 þegar liðin gengu til búningsherbergja.

Heimamenn voru enn sterkari aðilinn í síðari hálfleik og það var að lokum Fabio Vieira sem gulltryggði 3-0 sigur Arsenal með marki þegar um fimm mínútur voru til leiksloka.

Arsenal er því á toppi A-riðils eftir sigurinn með sex stig eftir tvo leiki, tveimur stigum meira en Alfons og félagar sem hafa leikið einum leik meira.