Marsspá Siggu Kling - Ljónið

Það er eins og þú sért að fara inn í níunda sporið í tólf spora kerfinu. Þú bætir fyrir það sem ÞÉR finnst þú hafir gert, þú finnur auðmýktina flæða yfir þig, svona svipað og þegar maður fær að vita að krabbameinið í líkama okkar sé horfið. Þá sérðu allt í öðru ljósi og getur þakkað fyrir allt það sem fyrir þig hefur komið og erfiðleikana sem yfir þig hafa flætt. Þú losnar úr þeim viðjum sem haldið hafa þér niðri og elskar af öllu hjarta. Þú gefur fólki þann tíma sem það þarf til þess að sættast og sjá þig í björtu ljósi.

Vormánuðir gefa þér betri undirstöðu og það öryggi sem þér finnst þú eiga skilið, hvort sem það tengist efnislegum gæðum eða ást frá hjartanu. Það er allskyns dót og drasl að fara í taugarnar á þér, heldur betur. Þú hendir og gefur hluti sem þú bjóst alls ekki við að þú myndir láta frá þér. Það gerist líka atburður á þessu tímabili sem gerir þig sterkari, af því að þú þarft þess. Þetta er eitthvað sem er ekki hægt að koma í veg fyrir, heldur er partur af þínum örlögum og annarrar manneskju.

Þú átt eftir að finna það að það verður reynt að tæla þig til að taka þátt í neikvæðri orku sem er ekki gædd góðvilja. Þú munt strax frá boð til hugans um að segja nei og þú munt líka strax finna ef verið er að ljúga að þér. Þetta er ofboðslega gott tímabil, en þú þarft að hafa fyrir því og þú getur farið í gegnum fjöll með því að segja: „Ég get, ég ætla og ég skal“ og ekkert mun þá trufla þig. Það er mikil fegurð yfir persónu sem kemur eins og engill til þín þegar að líða tekur á vorið og er send til að hjálpa þér

Knús og kossar, Sigga Kling