Kaldasti mars­mánuður í rúm 40 ár

Í tilkynningu á vef Veðurstofunnar kemur fram að meðalhiti í byggðum landsins í mars hafi verið rúmlega þremur stigum undir meðallagi. 

Samfelld kuldatíð ríkti frá sjötta til 28. mars en kaldast var á norðaustan- og austanverðu landinu. Þar að auki var mjög úrkomusamt á Austfjörðum í lok mánaðar og töluverð snjóþyngsli. Fjöldi snjó- og krapaflóða féllu þar í lok mánaðar, þau stærstu í Neskaupstað.

Á þessu tímabili var hins vegar óvenju þurrt og sólríkt á Suðvesturlandi. Í Reykavík var um að ræða bæði næstþurrasta og næstsólríkasta marsmánuð frá upphafi mælinga. Veturinn í heild sinni var mjög sólríkur í Reykjavík og hefur hann ekki verið jafnsólríkur síðan 1947.

Kaldasta sex vikna tímabil frá Frostavetrinum mikla

Þessi kaldi marsmánuður markaði sömuleiðis endalok kaldasta vetrar síðan 1995. Eftir mjög hlýjan nóvembermánuð hófst nær samfelld kuldatíð á landinu sem stóð frá sjöunda desember til nítjánda janúar. Kuldatíðin var sérstaklega mikil á suðvesturhorninu, og voru þessar sex vikur þær köldustu í Reykjavík síðan 1918.

Þá segir enn fremur í tilkynningunni „Á þessu tímabili var þrýstingur sérlega hár, vindur hægur og það var óvenju þurrt og bjart, sérstaklega suðvestanlands. Það var umhleypingasamt seinni hluti janúar og í febrúar. Töluverðir vatnavextir voru í ám í kjölfar leysinga um miðjan febrúar. Ástandið var verst á vestanverðu landinu þar sem ár flæddu víða yfir bakka sína og skildu sums staðar eftir sig stærðar klaka eftir að hafa rutt sig eftir kuldatíðina fyrr um veturinn.“

Í samtali fréttastofu við Einar Sveinbjörnsson, veðurfræðing, sagði hann að veturinn hafi verið óvenjulegur miðað við hvað hann hefur verið ofboðslega kaflaskiptur og sökum langra kuldakafla. Þó mars hafi verið kaldur segir hann að í apríl séum við búin að fá hlýja dag.