Telur Man. Utd eiga séns á að landa Bellingham

Scholes, sem er fyrrverandi leikmaður United, tjáði sig um hinn 19 ára gamla Bellingham í beinni útsendingu á BT Sport í gær, vegna leiks United við Sevilla í Evrópudeildinni.

Framtíð Bellingham er í óvissu en búist er við því að hann fari frá Dortmund í sumar fyrir gríðarháa upphæð – svo háa að Liverpool hefur verið sagt hætt að eltast við enska landsliðsmanninn.

Scholes segir að Bellingham gæti gert United að hörkugóðu liði til næstu ára í ljósi þess hve ungur hann sé.

„Ég held að þeir séu eitt af þeim félögum sem koma til greina. Ef að maður færi nokkur ár aftur í tímann þá hefði maður sagt að það væri ekki séns. Jafnvel í byrjun þessarar leiktíðar var það þannig,“ sagði Scholes.

„En núna held ég að þeir hljóti að vera [í baráttunni um að fá Bellingham]. Hann gæti horft á þetta lið og séð að það er á uppleið á næstu árum.

Ég held að hann muni fara til Real Madrid, ég veit ekki alveg af hverju, en ég vona að hann komi hingað. Hann myndi gera United að alvöru liði,“ sagði Scholes.