Byrjað að bæta í vind og fyrsta gula við­vörunin hefur tekið gildi

Á vef Veðurstofunnar segir að upp úr hádegi verði suðvestan fimmtán til 23 metrar á sekúndu og hvassast sunnan- og vestanlands. Þurrt að kalla norðaustantil en annars skúrir og stöku haglél.

Reikna má með hita á bilinu fimm til fimmtán stig, hlýjast á Norðausturlandi.

Gulu viðvaranirnar eru í gildi ýmist langt fram á kvöld eða til morguns. Viðvörun fyrir Miðhálendið tók gildi snemma í morgun en gular viðvaranir fyrir höfuðborgarsvæðið og Faxaflóa klukkan 10. Varanir taka guldi fyrir Suðurland, Breiðafjörð, Vestfirði, Suðausturland og Strandir og Norðurland vestra klukkan 11 og 12, Austurland að Glettingi klukkan 14 og Norðurland eystra klukkan 15. 

Seint í kvöld og í nótt dregur svo úr vindi og á morgun verður vestlæg átt, víða tíu til átján metrar á sekúndu, en heldur hægari norðanlands. Skúrir eða slydduél og kólnandi veður en að mestu bjart suðvestantil.

Veðurhorfur á landinu næstu daga

Á miðvikudag: Vestan 10-20 m/s, hvassast með suðurströndinni. Skúrir eða slydduél, einkum fyrir norðan, en þurrt að kalla austast. Hiti 3 til 10 stig, mildast suðaustanlands.

Á fimmtudag: Suðvestan 5-13 m/s, hvassast syðst. Bjart að mestu, en dálitlar skúrir norðvestantil. Hiti 7 til 12 stig.

Á föstudag: Suðlæg átt og rigning eða súld, en úrkomminna austanlands. Hiti 7 til 16 stig, hlýjast á Norðausturlandi.

Á laugardag: Vestlæg átt með rigningu eða slyddu, en úrkomulítið austanlands. Styttir upp síðdegis. Heldur kólnandi.

Á sunnudag og mánudag: Útlit fyrir suðvestlæga átt með súld, en úrkomuminna austanlands. Hlýnandi.