Á framandi slóðum með Heims­ferðum

Heimsferðir bjóða árlega upp á fjölda spennandi sérferða á framandi slóðir og er engin breyting þar á þetta árið segir Trausti Hafsteinsson, sölustjóri Heimsferða. „Í ár bjóðum við upp á óvenju spennandi áfangastaði þar sem íslenskir fararstjórar leiða ferðirnar í samvinnu við innlenda leiðsögumenn þar sem við á."

Hann segir ferðirnar eiga það sameiginlegt að bjóða upp á einstaka og framandi menningu, spennandi matargerð, skemmtilegar skoðunarferðir og sólina sem verður alltaf á sínum stað. 

„Við pössum okkur á því að hafa hópana ekki of stóra og leggjum alltaf mikið upp góðum gististöðum og aðbúnaði, skemmtilegum dagleiðum og góðri upplifun.“

Einstakar strendur og fjörug sjósportaiðkun

Heimsferðir bjóða upp á sólarferðir til tveggja staða í Marokkó í Norður Afríku, Agadir og Taghazout.

Agadir er er stærsti sólstrandarstaður Marokkó og býður upp á fallega gullna strandlengju. Borgin sjálf er sjöunda stærsta borg landsins en hún er nútímaleg borg með breiðgötum, blómstrandi görðum, góðum hótelum, fallegri snekkjubátahöfn og líflegri höfn þar sem heimamenn bjóða fiskinn sinn til sölu. „Það má segja að ferðirnar okkar til Agadir bjóði upp á ævintýri fyrir fólk á öllum aldri,“ segir Trausti. „Agadir er svolítið skyldur evrópskum strandbæjum og einkennist af öryggi og rólegheitum. Við bjóðum upp á flotta gististaði þar og stutt er í gamla bæinn. Þarna má líka finna dásamlega smábátahöfn, fjölbreytta verslun út um allt og maturinn er alveg dásamlegur.“

Strandbærinn Taghazout er staðsettur í 16 km. fjarlægð frá Agadir. „Taghazout, og raunar Agadir líka, er þekkt fyrir einstaka strönd og fjöruga sjósportaiðkun þar sem hægt er að gleyma sér með sæþotum, við brettaiðkun, köfun og siglingum. Svo má segja að Taghazout sé paradís fyrir golfara en á svæðinu má finna magnaða golfvelli og glæsileg stjörnuhótel fyrir golfara. Heimsferðir bjóða einnig upp á sérstaka golfferð þangað í lok október.“

Frá báðum strandbæjunum er boðið upp á spennandi skoðunarferðir, til dæmis til Marrakech sem er frægasta borg Marokkó, boðið er upp á sveitaferðir, loftbelgjaflug, kameldýrareið, kvöldskemmtun út í eyðimörkinni og margt fleira.

Rauða perla suðursins er heillandi, suðræn og seiðandi

Einnig er hægt að velja borgarferð til Marokkó en um er að ræða borgina Marrakech sem er önnur stærsta borg Marokkó á eftir Casablanca og þekkt undir nafninu „Rauða perla suðursins“. „Borgin er umvafin fallegum byggingum, moskum, höllum og sögufrægum stöðum,“ segir Trausti

„Þetta er virkilega heillandi, seiðandi og suðræn borg með alla sína markaði og skemmtilegu andrúmslofti stórborgar. Andstæðurnar í mannlífinu hér eru miklar en með heimsókn til borgarinnar má segja að við komumst næsta hjarta Marokkó.“

Einstök menning í bland við ævintýraheim undirdjúpanna

Strandbærinn Sharm El Sheikh í Egyptalandi er einn af vinsælustu áfangastöðum Evrópu- og mið Austurlandabúa en þangað sækir fólk sólina, hlýju og einstakrar menningar. „Umhverfi bæjarins er einstök blanda af eyðimerkursandi, klettum og hinu einstaka Rauða hafi sem er náttúruperla út af fyrir sig,“ segir Trausti. „Strandsvæðið við Rauða hafið býður m.a. upp á kóralrifin sem er svo sannarlega ævintýraheimur undirdjúpanna. Svæðið er vinsælt til köfunar enda bæði volgt og tært. Það er alveg þess virði að skella sér í köfun eða snorkla við ströndina og heilsa upp á Nemo og félaga.“

Boðið er upp á fimm stjörnu hótel þar sem allt er innifalið. „Það fer því vel um okkar fólk þar eins og reyndar á öðrum viðkomustöðum okkar. Stutt er á markaðinn í gamla bænum og egypsk menning er allt umlykjandi “

Vera Illugadóttir er gengin til liðs við Heimsferðir og mun leiða tvær spennandi skoðunarferðir. „Annars vegar mun hún leiða skoðunarferð til Kaíró þar sem Píramídarnir, Sphinxinn og þjóðminjasafnið í Kaíró verður heimsótt. Hin ferðin er til Luxor þar sem Konungadalurinn er heimsóttur en þar hvíla nokkrir faraóar í grafhýsum neðanjarðar. Einnig skoðum við frægar styttur, höll Hatshepsut drottningar, falleg hof í Karnak og Luxor Temple.“

Kaíró er veisla fyrir öll skilningarvitin

Heimsferðir bjóða einnig upp á borgarferð til Kaíró, höfuðborgar Egyptalands. Borgin er sú fjölmennasta í Afríku og ein fjölmennasta borg heims. „Kaíró er sannkölluð ævintýraveröld og best kannski að lýsa henni sem veislu fyrir öll skilningarvitin,“ segir Trausti. „Það er bara svo mikið um að vera í Kaíró, mannlífið og áreitið, utan þessara mögnuðu bygginga sem pýramídarnir eru en þeir liggja skammt fyrir utan borgina. Boðið verður upp á bæjarferð í miðbæ Karíró þar sem við skoðum það helsta og píramídarnir og Sphinxinn verða heimsóttir ásamt Þjóðminjasafninu.“

Í Kaíró er boðið upp á tvö glæsileg hótel sem bæði eru staðsett við einn stærsta verslunarkjarnann í borginni. „Þannig að ferðalangar fá líka tækifæri til að versla á sama tíma. En fyrst og fremst er það menningarheimur Egypta sem er svo heillandi.“

Njóttu lífsins yfir aðventuna í ævintýraferð á Tælandi

Hvernig væri að eyða lokadögum aðventunnar og jólunum á framandi slóðum í Tælandi? Nú býður Heimsferðir upp fjórtán daga ævintýraferð til strandbæjarins Hua Hin sem er ein elsta ferðamannaparadís Tælands og heimsborgarinnar Bankok. „Þetta er sannarlega öðruvísi jólaferð sem inniheldur sólríkar strendur, framandi menningu og matargerð, einstaka gestrisni heimamanna og góða afslöppun,“ segir Trausti. „Við munum bjóða upp á ótrúlega spennandi dagskrá en þetta er fyrsta ferð okkar á þessar slóðir. Hægt er að velja milli þriggja frábærra gististaða á Hua Hin og í Bankok munum við dvelja á glæsilegu 4 stjörnu hóteli.“

Með strandlífið í fararbroddi verður hægt að njóta lífsins til hins ítrasta yfir aðventuna og hátíðina að sögn Trausta. „Þarna er stórfenglegt loftslag og mjög þægilegur hiti. Síðan er boðið upp á frábærar ferðir frá strandsvæðinu og iðandi mannlífið í Bankok er mögnuð upplifun enda er borgin heill ævintýraheimur út af fyrir sig.“

Skemmtileg blanda af sól og fjörugu borgarlífi

Nýjasta ferðin hjá Heimsferðum er til Tel Aviv í Ísrael en boðið verður upp á ferð þangað í ágúst. „Ísrael er tiltölulega nýr áfangastaður fyrir Íslendinga en borgin Tel Aviv stendur við Miðjarðarhafið og býður því upp á glæsilegar strendur fyrir sólþyrsta Íslendinga. Heimsferðir bjóða upp á 4 stjörnu hótel sem eru vel staðsett við ströndina en borgin er skemmtileg blanda af sól og fjörugu borgarlífi. Það er stutt inn í gamla bæinn með alla sína mögnuðu sögu þannig að hér er auðvelt að blanda saman strandbæjarlífi og heillandi borgarferð.“

Í lokin bendir Trausti á að Heimsferðir sérsmíða einnig sérferðir fyrir hópa og hreyfiferðir eins og hjóla-, göngu- og jógaferðir. „Sendið okkur fyrirspurn á netfangið sala@heimsferdir.is eða hafið samband í síma 595-1000 og við finnum spennandi lausn fyrir ykkur.“

Nánari upplýsinga á heimsferdir.is.