Frumsýning á Vísi: GKR og Nossan sleppa neikvæðninni

Oddur Ævar Gunnarsson skrifar 27. júlí 2023 11:30

GKR segist hafa verið aðdáandi norska rapparans áður en um er að ræða þeirra fyrsta samstarfsverkefni.

Rapparinn Gaukur Grétuson, betur þekktur sem GKR hefur gefið út nýtt tónlistarmyndband við lag sitt AHA AHA en í þetta skiptið er norski rapparinn Nossan með í för. Myndbandið er frumsýnt á Vísi og má horfa á hér að neðan.

GKR hefur undanfarin ár búið í Bergen í Noregi og þar reglulega komið fram á tónlistarviðburðum. AHA AHA er hans fyrsta lag með norskum tónlistarmanni en lagið er bæði á íslensku og norsku.

Klippa: GKR X Nossan - AHA AHA

Þekkti Nossan ekkert þegar textinn var saminn

„Maður getur ekki komist áfram í lífinu ef maður dvelur í neikvæðninni. Það er algjör uppgötvun fyrir mann eins og mig. Þó ég trúi að ég sé ákveðið magn af ljósi, þá hef ég stundum dvalið í neikvæðninni og þetta lag er um það að sleppa tökum af þeirri hugsun,“ segir GKR í samtali við Vísi.

Óhætt er að fullyrða að um alþjóðlegt samstarf sé að ræða en GKR hóf að vinna að laginu þegar hann var staddur í Los Angeles í Bandaríkjunum í október í fyrra. Lagið er framleitt og mixað af Starra en Oculus sér um hljóðvinnslu.

Óhætt er að fullyrða að þeir félagar fari ótroðnar slóðir í myndbandinu við lagið.

„Ég hafði aldrei hitt rapparann áður en við erum algjörir félagar í dag. Ég heyrði í strák sem heitir Felix, en hann leikstýrir, klippir og gerir myndbandið. Nossan er félagi hans. Ég sagðist vera mikið til í að vinna með norskum rappara í laginu og það næsta sem ég veit er að hann segir mér að Nossan sé búinn að taka upp vers fyrir lagið.“

GKR segist hafa verið mikill aðdáandi norska rapparans áður og því himinlifandi með samstarfið. Nossan sé hluti af vinahópi ungra listamanna í Osló sem GKR hafi kynnst vel við framleiðsluna á myndbandinu.

Rappararnir kynntust vel við tökur á myndbandinu.

Allt til alls á skíðasvæði

Myndbandið var tekið upp á skíðasvæðinu Kvitfjell í Noregi. GKR segir að á tímabili hafi ekki einu sinni verið ákveðið að taka upp myndband við lagið, það hafi verið gert með litlum fyrirvara.

„Þetta svæði er í um þriggja tíma akstursfjarlægð frá Osló. Við ætluðum ekki einu sinni að gera myndband. Við enduðum einhvern veginn á því að kýla bara á þetta. Þarna var allt til alls, skíðalyfta sem við sáum fyrir tilviljun við tökur og risastórt opið svæði í bakgrunni.“

Rappararnir ákváðu á síðustu stundu að gera tónlistarmyndband við lagið.

Rapparinn segist hafa nóg fyrir stafni en hann mun koma fram á Airwaves tónlistarhátíðinni í Reykjavík sem haldin er í nóvember.

„Ég er að fara að spila á Airwaves í nóvember og mun setja mikið í það gigg og vill búa til alvöru stemningu. Ég hlakka mikið til að deila því sem ég hef verið að vinna í.“