Mikil lægð mun stjórna veðrinu næstu daga

Reiknað er með hita víða á bilinu tólf til tuttugu stig að deginum, hlýjast norðaustanlands.

Í hugleiðingum veðurfræðings segir að mikil lægð sé að koma sér fyrir suður í hafi og muni hún stjórna veðrinu hjá okkur næstu daga. Austlægar áttir verði ríkjandi og muni lægðin dæla hlýjum og rökum loftmassa yfir landið fram yfir helgi.

„Á morgun verður vætusamt sunnan- og vestanlands, en úrkomulítið verður norðaustantil. Útlit fyrir fínasta sumarveður um helgina og ætti að sjást til sólar í flestum landshlutum, nema austast verður líklega viðloðandi þokusúldarloft, einkum við sjávarsíðuna,“ segir á vef Veðurstofunnar.

Veðurhorfur á landinu næstu daga

Á fimmtudag: Suðaustlæg átt, 5-13 m/s, hvassast suðvestantil. Rigning, jafnvel talsverð suðvestan- og vestanlands, en þurrt að kalla austast á landinu. Hiti 10 til 20 stig, hlýjast norðaustantil.

Á föstudag: Austlæg átt, 5-10, en 10-15 syðst. Dálítil rigning eða súld suðaustantil og vestast á landinu, en annars þurrt að kalla. Hiti 12 til 20 stig, en mun svalara í þokulofti við austurströndina.

Á laugardag: Austlæg átt 3-10 en 10-15 við suðausturströndina. Skýjað að mestu og smásúld austanlands, en annars bjart með köflum. Hiti 9 til 20 stig, svalast fyrir austan.

Á sunnudag: Austlæg átt og lítilsháttar rigning eða súld öðru hverju, en bjart með köflum á Vestur- og Norðurlandi. Hiti breytist lítið.

Á mánudag og þriðjudag: Útlit fyrir norðlæga átt. Væta með köflum sunnan- og vestanlands, en annars úrkomulítið. Hiti 8 til 15 stig, hlýjast sunnan heiða.