Úr­komu­svæðin fjar­lægjast, gestum Menningar­nætur til gleði

Á vef Veðurstofunnar segir að hiti verði yfirleitt á bilinu tólf til tuttugu stig, hlýjast norðaustalands.

Í hugleiðingum veðurfræðings segir að það verði allmikil og hægfara lægð langt suður í hafi sem muni stýra veðrinu fram yfir helgi, en það þýði að austanáttir verði ríkjandi, jafnvel allhvassar allra syðst.

„Því er í gildi athugasemd vegna snarpra vindhviða undir Eyjajfjöllum og í Mýrdal á morgun, sem gætu verið varasamar ökumönnum, t.d. með tengivagna.

Lægðin blæs hlýju lofti yfir landið, þ.a. hitatölur verða með skásta móti, en hlýja loftinu fylgir vitaskuld einnig raki frá hafinu umhverfis, sem skilar sér í rigningu eða súld með köflum, einkum sunnan- og vestanlands.

Til allrar hamingju fyrir gesti menningarnætur Reykjavíkur á laugardag virðast úrkomusvæðin hafa fjarlægst landið það mikið, að birti til á Suður- og Vesturlandi. Flugeldasýningin ætti því að sjást vel á öllu höfðuborgarsvæðinu, sem eflaust mun gleðja hátíðargesti,“ segir á vef Veðurstofunnar.

Veðurhorfur á landinu næstu daga

Á föstudag: Suðaustlæg átt, 5-10 m/s, en 10-15 syðst. Dálítil rigning eða súld öðru hvoru á sunnanverðu landinu, en annars þurrt að kalla. Hiti 12 til 20 stig, hlýjast á Norðausturlandi, en svalara í þokulofti við austurströndina.

Á laugardag: Austlæg átt 3-10 m/s, en 10-15 við suðausturströndina. Skýjað og smásúld austast, en annars bjart með köflum. Hiti 9 til 19 stig, svalast fyrir austan.

Á sunnudag: Norðaustlæg átt og lítilsháttar rigning eða súld austantil, en annars bjart með köflum. Áfram fremur hlýtt.

Á mánudag og þriðjudag: Útlit fyrir norðlæga átt. Væta með köflum á austanverðu landinu, en annars úrkomulítið. Hiti 8 til 18 stig, hlýjast sunnan heiða.

Á miðvikudag: Líklega hægir vindar, þurrt að mestu og milt.